كوپتەن بەرى كوزدەن تاسالانعان مەملەكەت قايراتكەرى ساۋات مىڭباەۆتىڭ مۇگەدەكتەرگە ارنالعان اربادا وتىرعان سۋرەتى تارادى. الەۋمەتتىك جەلىدە تاراعان سۋرەت ساۋات مىڭباەۆ قىزىنىڭ ۇيلەنۋ تويىندا تۇسىرىلگەن. جەلى قولدانۋشىلارى ساياساتكەر قىزىنىڭ ءۇندى ازاماتىنا تۇرمىسقا شىققانىن جازىپ جاتىر، دەپ حابارلايدى "ادىرنا" ۇلتتىق پورتالى inbusiness.kz-كە سىلتەمە كورسەتە وتىرىپ.
تەلەگرام ارناسىنىڭ حابارلاۋىنشا، ساۋات مىڭباەۆ تۇركيانىڭ يزمير قالاسىندا وتكەن قىزىنىڭ تويىنا بارعان. فوتودا ول مۇگەدەكتەرگە ارنالعان اربادا وتىر.
ەسكە سالايىق، 2021 جىلى "قازاقستان تەمىر جولىنىڭ" سول كەزدەگى توراعاسى ساۋات مىڭباەۆ سپورتپەن شۇعىلدانۋ كەزىندە ومىرتقاسىنان جاراقات الىپ، اۋرۋحاناعا تۇسكەنى حابارلانعان بولاتىن.
"قازاقستان تەمىر جولى" ۇلتتىق كومپانياسىنىڭ توراعاسى ساۋات مىڭباەۆ سپورتپەن شۇعىلدانۋ كەزىندە جاراقات الدى. قازىرگى ۋاقىتتا ەمدەلىپ جاتىر. دەنساۋلىعىنا قاۋىپ ءتونىپ تۇرعان جوق", - دەلىنگەن حابارلامادا.
كوپشىلىك ونىڭ بەل ومىرتقاسىن سپورت كەزىندە سىندىرىپ العانىنا كۇمانمەن قاراعان.
ساۋات مىڭباەۆ "قازاقستان تەمىر جولى كومپانياسىن" 2018 جىلى باسقاردى. بۇعان دەيىن "قازمۇنايگاز" ۇلتتىق مۇناي-گاز كومپانياسىن باسقارعان. سونداي-اق، پرەزيدەنت اكىمشىلىگىنىڭ باسشىسى، ۆيتسە-پرەمەر، اۋىل شارۋاشىلىعى ءمينيسترى، ەنەرگەتيكا ءمينيسترى، يندۋستريا جانە ساۋدا ءمينيسترى سىندى لاۋازىمدى قىزمەتتەردى اتقاردى.
"ادىرنا" ۇلتتىق پورتالى
