مەملەكەتتىك ورگانداردىڭ جۇمىسىن وڭتايلاندىرۋ پروتسەسىنىڭ شەڭبەرىندە رەسەي فەدەراتسياسىمەن ءوزارا ىنتىماقتاستىقتىڭ جوعارى دەڭگەيىن ەسكەرە وتىرىپ، قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلدىگىنىڭ جۇمىسىن توقتاتۋ تۋرالى شەشىم قابىلداندى. بۇل تۋرالى قر ساۋدا جانە ينتەگراتسيا مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
بۇل قازىرگى ۋاقىتتا قازاقستاندىق بيزنەس ءۇشىن رەسەي باعىتىندا جۇمىس ىستەۋ جانە بارلىق وپەراتسيالىق ماسەلەلەردى شەشۋ ءۇشىن ينستيتۋتسيونالدىق جاعدايلار جاسالعاندىعىنا بايلانىستى. بۇل رەتتە بوساتىلعان بىرلىكتەر قازاقستاننىڭ باسقا ەلدەردە ديپلوماتيالىق قاتىسۋىن كۇشەيتۋگە باعىتتالاتىن بولادى.
«بۇل شەشىم 1992 جىلعى 22 قازانداعى ساۋدا وكىلدىكتەرىن ءوزارا قۇرۋ تۋرالى ۇكىمەتارالىق كەلىسىمنىڭ كۇشىن جويۋدى تالاپ ەتپەيدى جانە رەسەي فەدەراتسياسىنىڭ قر-داعى ساۋدا وكىلدىگىنىڭ جۇمىسىنا جانە جالپى ەكىجاقتى ساۋدا-ەكونوميكالىق ىنتىماقتاستىقتىڭ دامۋىنا اسەر ەتپەيدى»، -دەلىنگەن حابارلامادا.
رەسەي فەدەراتسياسى قازاقستاننىڭ نەگىزگى ساۋدا-ەكونوميكالىق سەرىكتەسى. بۇل بىرقاتار وبەكتيۆتى فاكتورلارعا بايلانىستى: گەوگرافيالىق ورنالاسۋى، ەاەو-نىڭ جالپى ەكونوميكالىق كەڭىستىگى، دامىعان شارتتىق-قۇقىقتىق بازاسى، ەكىجاقتى ىنتىماقتاستىقتى ىلگەرىلەتۋ ءۇشىن ءتيىمدى الاڭداردىڭ بولۋى (ۇكىمەتارالىق كوميسسيا، وڭىرارالىق ىنتىماقتاستىق فورۋمى، ساۋدا-ەكونوميكالىق ىنتىماقتاستىقتىڭ نەگىزگى باعىتتارى بويىنشا كىشى كوميسسيالار). بۇگىنگى تاڭدا قازاقستاندا رەسەيدىڭ قاتىسۋىمەن 8 مىڭعا جۋىق كومپانيا جانە 3348 بىرلەسكەن كاسىپورىن جۇمىس ىستەيدى. ماسكەۋدەگى حشجك اۋماعىندا حالىقارالىق ماڭىزى بار «قازاقستان» ساۋدا-كورمە ورتالىعى («QazExpoCongress» ۇك» اق جالعىز قاتىسۋشىسى) جۇمىس ىستەيدى. ونىڭ مىندەتتەرىنە مادەني-گۋمانيتارلىق جانە ساۋدا-ەكونوميكالىق ىنتىماقتاستىقتى ىلگەرىلەتۋ كىرەدى.
رەسەي فەدەراتسياسىندا ەكونوميكالىق ديپلوماتيانى ىلگەرىلەتۋ فۋنكتسياسىن ەسكەرە وتىرىپ، قازاقستاننىڭ رەسەي فەدەراتسياسىنداعى ەلشىلىگىنەن باسقا سانكت-پەتەربۋرگ، ومبى، قازان جانە استراحان قالالارىنداعى باس كونسۋلدىقتار ءتيىمدى جۇمىس ىستەيدى. سونىمەن قاتار ەكاتەرينبۋرگ قالاسىندا قازاقستاننىڭ باس كونسۋلدىعىن اشۋ ماسەلەسى تالقىلانۋدا.
قازاقستاننىڭ رەسەي فەدەراتسياسىنداعى ساۋدا-ەكونوميكالىق ىنتىماقتاستىعى بويىنشا جۇمىس رەسەيدىڭ بارلىق ءىرى قالاسى مەن ايماقتارىندا قۇرىلعان «QazTrade» سسدو اق سەرىكتەستىك جەلىسى ارقىلى جالعاستىرىلاتىن بولادى.
قازاقستان مەن رەسەي اراسىنداعى تاۋار اينالىمى 2022 جىلعى قاڭتار-قاراشادا 23,6 ملرد. اقش دوللارىن قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 6,8% - عا جوعارى (22,1 ملرد. اقش). 2021 جىلى قازاقستان مەن رەسەي اراسىنداعى تاۋار اينالىمى 24,6 ملرد. اقش دوللارىن قۇرادى، بۇل 2020 جىلمەن سالىستىرعاندا 31,2% - عا جوعارى (18,8 ملرد. اقش).
