قازاقستاندا 2022 جىلى مىندەتتى الەۋمەتتىك مەديتسينالىق ساقتاندىرۋ قورىنىڭ قىزمەتكەرلەرىنە ەڭبەكاقى تولەۋگە 9 ملرد تەڭگەدەن استام سوما جۇمسالدى. بۇل تۋرالى مەكەمەنىڭ باسقارما توراعاسى ءسابيت احمەتوۆ ورتالىق كوممۋنيكاتسيالار قىزمەتىندە وتكەن بريفينگتە مالىمدەدى، دەپ حابارلايدى “ادىرنا” ۇلتتىق پورتالى.
ورتا ەسەپپەن العاندا 2022 جىلدىڭ قورىتىندىسى بويىنشا قىزمەتكەرلەردى ۇستاۋعا 9 ميلليارد تەڭگەدەن استام قاراجات جۇمسالدى. قوردا مىڭعا جۋىق ادام جۇمىس ىستەيدى. ءبىزدىڭ بارلىق وبلىس بويىنشا فيليالدارىمىز بار، وندا 700-گە جۋىق ادام جۇمىس ىستەيدى، - دەدى ءسابيت احمەتوۆ.
قارجىنىڭ 80 پايىزى ەڭبەكاقىنى، 20 پايىزى وزگە شىعىنداردى وتەۋگە جۇمسالعان.
سونىمەن قاتار ءسابيت احمەتوۆ الەۋمەتتىك ساقتاندىرۋ قورىندا قىزمەتكەرلەردىڭ ۇزاق مەرزىمگە تۇراقتالمايتىنىن ايتتى.
ورتاشا جالاقى – شامامەن 450 مىڭ تەڭگەنى قۇرايدى. بىراق بۇل ونداي كوپ سوما ەمەس. سەبەبى بىزدە جىل سايىن كادرلاردىڭ اۋىسۋى 22 پايىزدى قۇرايدى. ياعني ءاربىر بەسىنشى ادام جىل سايىن جۇمىستان كەتەدى دەگەن ءسوز. جۇكتەمە وتە ۇلكەن بولعاندىقتان، جۇمىس تا وتە كوپ. سايكەسىنشە ولار مۇنداي جۇكتەمەگە شىداماي، قىزمەتتەن كەتەدى. ەگەر جالاقىمىز جاقسى بولعاندا، وندا ادامدار بىزدەن كەتپەيتىن ەدى، – دەدى ول.
