بۇگىن پرەمەر-ءمينيستردىڭ ورىنباسارى ەرالى توعجانوۆ "دەنى ساۋ ۇلت" ۇلتتىق مەديتسينالىق ءسامميتىنىڭ سالتاناتتى ءىس-شاراسىنا قاتىسىپ، مەديتسينا سالاسىنىڭ قىزمەتكەرلەرىن مەملەكەتتىك ناگرادالارمەن ماراپاتتادى، دەپ حابارلايدى “ادىرنا” ۇلتتىق پورتالى.
ءىس-شاراعا مەملەكەتتىك ورگانداردىڭ قىزمەتكەرلەرى، مەديتسينالىق قوعامداستىق وكىلدەرى جانە ەلىمىزدىڭ عالىمدارى قاتىستى.
ۆيتسە-پرەمەر مەملەكەت باسشىسىنىڭ مەديتسينا قىزمەتكەرلەرى كۇنىنە وراي رەسمي قۇتتىقتاۋىن وقىپ بەردى.
ۆيتسە-پرەمەر ءوز سوزىندە مەملەكەت باسشىسىنىڭ قولداۋىنىڭ ارقاسىندا ەلىمىزدەگى مەديتسينا دەڭگەيى جىل سايىن دامىپ جاتقانىن اتاپ ءوتتى.
سونداي-اق، كوروناۆيرۋستىق ينفەكتسيامەن كۇرەستە الدىڭعى شەپتە جۇرگەن ءاربىر مەديتسينا قىزمەتكەرىنىڭ قاجىرلى ەڭبەگىنىڭ ارقاسىندا ەلدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋگە قول جەتكىزىلگەنىن اتاپ ءوتتى.
“مەملەكەت مەديتسينا قىزمەتكەرلەرىن قولداۋ بويىنشا بىرقاتار شارالار قابىلداۋدا. جالاقى ءوستى، حالىقارالىق ستاندارتتارعا سايكەس كەلەتىن ەڭبەك جاعدايلارى جاسالۋدا. ءبىز دەنساۋلىق ساقتاۋ جۇيەسىندەگى جەتىستىكتەرىمىزدى ماقتان تۇتامىز، بىراق بۇنىمەن شەكتەلمەيمىز. مەديتسينا قىزمەتكەرلەرى جۇمىسىنىڭ ناتيجەلەرى تىكەلەي الەۋمەتتىك اسەرگە يە ەكەنىن اتاپ وتكىم كەلەدى، وعان ناقتى ادامداردىڭ ءومىرى عانا ەمەس، جالپى قوعامنىڭ تۇراقتىلىعى دا تاۋەلدى", - دەدى ەرالى توعجانوۆ.
سونداي-اق، ول پاندەميا ەلدى ۆاكتسينالارمەن، ءدارى-دارمەكتەرمەن جانە زاماناۋي مەديتسينالىق جابدىقتارمەن قامتاماسىز ەتۋ قاجەتتىلىگىن كورسەتتى.
“سونىمەن قاتار ءبىز الدىمىزعا 2025 جىلعا قاراي وتاندىق وندىرىستەگى دارىلىك زاتتار مەن مەديتسينالىق بۇيىمداردىڭ ۇلەسىن 17 - دەن 50% - عا دەيىن ارتتىرۋ جونىندە ناقتى مىندەت قويدىق. ول ءۇشىن ۇكىمەت دەڭگەيىندە ارنايى كەشەندى جوسپار قابىلداندى. COVID – 19 پاندەمياسى كەزەڭىندە دەنساۋلىق ساقتاۋ جۇيەسىنىڭ ولقىلىقتارىن ەسكەرە وتىرىپ، ءبىز ەپيدەميولوگيالىق بولجاۋ مەن دەن قويۋدىڭ قازىرگى زامانعى جۇيەسىن قالىپتاستىرۋعا باعىتتالعان جۇمىستى كۇشەيتتىك. مەملەكەت باسشىسىنىڭ تاپسىرمالارىن ىسكە اسىرۋ اياسىندا "بيولوگيالىق قاۋىپسىزدىك تۋرالى" قر زاڭى قابىلداندى، - دەپ اتاپ ءوتتى ە.توعجانوۆ.
ىس-شارا بارىسىندا قر دەنساۋلىق ساقتاۋ ءمينيسترى اجار گينايات دارىگەرلەردى مەرەكەمەن قۇتتىقتادى. ول ەلىمىزدىڭ مەديتسينا قىزمەتكەرلەرىنىڭ اتىنان مەملەكەت باسشىسى مەن ەل ۇكىمەتىنە مەديتسينا سالاسىن قولداعانى ءۇشىن العىس ايتتى.
ەرالى توعجانوۆ ءوز ءسوزىن قورىتىندىلاي كەلە، مەديتسينا قىزمەتكەرلەرىنە كاسىبي شەبەرلىگى مەن كۇندەلىكتى قاجىرلى ەڭبەگى ءۇشىن تاعى العىس ءبىلدىردى.
”ادىرنا” ۇلتتىق پورتالى
