وقۋ-اعارتۋ ءمينيسترى عاني بەيسەمباەۆ مەكتەپتەگى ماسەلەلەر جايلى ءسوز ەتتى. ءمينيستردىڭ ايتۋىنشا، وعان مەكتەپتە اتا-انالاردان اقشا جينايتىنى تۋرالى شاعىمدار ءجيى كەلەءدى. كەيبىر اتا-انالار الەۋمەتتىك جەلىدەگى جەكە پاراقشاسىنا داۋىستاپ حابارلاما دا جىبەرگەن. حابارلامادا ءمينيستردىڭ بۇيرىعىنا قاراماستان مەكتەپ اكىمشىلىگىنىڭ «تيىن-تەبەننەن» تارتىنبايتىندىعى ءسوز بولىپتى. بۇل جايلى «ادىرنا» ۇلتتىق پورتالى حابارلايدى.
«جەكە پاراقشاما كۇندە حابارلاما كەلەدى. «ءسىز اقشا جيناماۋ كەرەك دەپ ايتىپ جاتىرسىز، بىراق كەيبىر بەلسەندى اتا-انالار مەن مۇعالىمدەر، سىنىپ جەتەكشىلەرى ديرەكتورمەن بىرگە بۇل ماسەلەگە پىسقىرىپ قارامايدى» دەگەن شاعىم تۇسەدى. ءتىپتى دىبىس حابارلاما دا جىبەرەدى. ونى تىڭداپ وتىرىپ، كادىمگىدەي قاتتى ۇيالامىن. حابارلامادا «ءيا، مينيسترلىكتەن اقشا جيناماسىن دەگەن بۇيرىق بار، بىراق ول بۇيرىققا قاراماڭدار، ءبىز ءبارىبىر جينايمىز. 5-10 مىڭ تەڭگەنى ايايسىڭدار ما؟» دەپ وقۋشىلارىنا دۇرسە قويا بەرگەن مۇعالىمنىڭ جازىلىپ قالعان ءسوزى كەلدى، - دەدى مينيستر.
مينيستر مۇنداي جاعدايلاردىڭ كوبەيىپ كەتكەنىن ايتىپ، پاراساتتى قوعامعا قاشان جەتەتىندىگىمىزگە قاتىستى ساۋال تاستادى.
- سوندا ءبىز قايدا بارا جاتىرمىز؟! نەگە بىزدە بەرىلگەن بۇيرىقتى ورىنداۋعا قاۋقار جەتپەيدى؟! سوندا ءبىز قانداي قوعامدى قۇرىپ جاتىرمىز؟»، - دەگەن مينيستر جەمقورلىقپەن كۇرەسۋدى ءار ادام وزىنەن باستاۋى كەرەكتىگىن جەتكىزدى.
سونىمەن قاتار، مينيستر مەكتەپتەگى سان قيلى ماسەلەنى جىكتەپ ءوتتى. قوعامىمىزدا ەستىپ جۇرگەن مەكتەپتەردەگى «ءولى جاندار» ەسەبىنەن قارجى جىمقىرۋ، ەسەپ بولىمىندەگى جەمقورلىققا قاتىستى وزگە دە بىلىقتاردى بىرلەسە جويۋعا شاقىردى.
«ادىرنا» ۇلتتىق پورتالى
