«5-10 myń teńgeni aıaısyńdar ma?» - Mektepte mınıstr buıryǵyna qaramastan aqsha jınaýdyń azaımaı turǵany aıtyldy

2235
Adyrna.kz Telegram

Oqý-aǵartý mınıstri Ǵanı Beısembaev mekteptegi máseleler jaıly sóz etti. Mınıstrdiń aıtýynsha, oǵan mektepte ata-analardan aqsha jınaıtyny týraly shaǵymdar jıi keledi. Keıbir ata-analar áleýmettik jelidegi jeke paraqshasyna daýystap habarlama da jibergen. Habarlamada mınıstrdiń buıryǵyna qaramastan mektep ákimshiliginiń «tıyn-tebennen» tartynbaıtyndyǵy sóz bolypty. Bul jaıly «Adyrna» ulttyq portaly habarlaıdy.  

«Jeke paraqshama kúnde habarlama keledi. «Siz aqsha jınamaý kerek dep aıtyp jatyrsyz, biraq keıbir belsendi ata-analar men muǵalimder, synyp jetekshileri dırektormen birge bul máselege pysqyryp qaramaıdy» degen shaǵym túsedi. Tipti dybys habarlama da jiberedi. Ony tyńdap otyryp, kádimgideı qatty uıalamyn. Habarlamada «Iá, mınıstrlikten aqsha jınamasyn degen buıryq bar, biraq ol buıryqqa qaramańdar, biz báribir jınaımyz. 5-10 myń teńgeni aıaısyńdar ma?» dep oqýshylaryna dúrse qoıa bergen muǵalimniń jazylyp qalǵan sózi keldi, - dedi mınıstr.

Mınıstr mundaı jaǵdaılardyń kóbeıip ketkenin aıtyp, parasatty qoǵamǵa qashan jetetindigimizge qatysty saýal tastady.

- Sonda biz qaıda bara jatyrmyz?! Nege bizde berilgen buıryqty oryndaýǵa qaýqar jetpeıdi?! Sonda biz qandaı qoǵamdy quryp jatyrmyz?», - degen mınıstr jemqorlyqpen kúresýdi ár adam ózinen bastaýy kerektigin jetkizdi.

Sonymen qatar, mınıstr mekteptegi san qıly máseleni jiktep ótti. Qoǵamymyzda estip júrgen mektepterdegi «óli jandar» esebinen qarjy jymqyrý, esep bólimindegi jemqorlyqqa qatysty ózge de bylyqtardy birlese joıýǵa shaqyrdy.

«Adyrna» ulttyq portaly

Pikirler