تاجىكستان مەن قىرعىزستان شەكاراسىندا ەكى تۇرعىن سنارياد جارىلىسىنان زارداپ شەكتى، دەپ حابارلايدى "ادىرنا" ۇلتتىق پورتالى 24.kg سايتىنا سىلتەمە جاساپ.
تاجىكستانمەن شەكارالاس ورنالاسقان باتكەن وبلىسىنىڭ ارقا-2 اۋىلىندا ايەل ءوز ءۇيىنىڭ اۋماعىندا سنارياد تاۋىپ، ونىڭ جارىلۋى سالدارىنان جاراقات الدى. وقيعا 5 جەلتوقسان كۇنى ورىن العان. بۇل تۋرالى قىرعىزستاننىڭ ۇلتتىق قاۋىپسىزدىك مەملەكەتتىك كوميتەتىنىڭ شەكارا قىزمەتى اقپاراتتىق ورتالىعى مالىمدەگەن.
اقپاراتقا سايكەس، ءۇي يەسى ەسكى قۇرىلىس ماتەريالدارى مەن تەمىرلەر جاتقان شاتىر استىن تازالاپ جۇرگەن كەزدە سنارياد تاۋىپ، جارىلىس ورىن العان. ايەل مەن 12 جاستاعى قىزى جاراقات الىپ، اۋرۋحاناعا جەتكىزىلگەن.
كەيىنىرەك حيرۋرگتار ءتيىستى وپەراتسيالار جاساپ، ناۋقاستاردىڭ جاعدايى تۇراقتالعان.
شەكارا قىزمەتى وكىلدەرىنىڭ ايتۋىنشا، سنارياد تابىلعان ءۇي 2022 جىلى تاجىك تاراپىنان بولعان وق اتۋ سالدارىنان ورتەنگەن. سول ۋاقىتتا ەكى ەل اراسىندا شەكارالىق قاقتىعىس ورىن العان بولاتىن.
قازىرگى ۋاقىتتا وقيعا ورنى شەكارا قىزمەتىنىڭ ينجەنەرلەرىمەن قورشالىپ، پوليتسيا تەرگەۋ جۇمىستارىن جۇرگىزۋدە.
سونداي-اق وقيعا بولعان كۇنى قىرعىز قۇقىق قورعاۋ ورگاندارى تاجىك ارىپتەستەرىنە بولعان جاعداي تۋرالى حابارلاعان. ارنايى قىزمەت تۇرعىنداردى شەكارا ماڭىنداعى كۇماندى زاتتاردى ۇستاماۋعا شاقىرىپ، ولاردى بايقاعان جاعدايدا شەكاراشىلارعا نەمەسە پوليتسياعا دەرەۋ حابارلاۋدى وتىنۋدە.
تاجىك-قىرعىز شەكاراسىنىڭ ۇزىندىعى 976 شاقىرىمدى قۇرايدى. ونىڭ تەك 664 شاقىرىمى جاقىندا عانا دەليميتاتسيالانىپ، دەماركاتسيادان وتكەن. داۋلى ايماقتاردا جولدار، سۋ جانە جەرگە قولجەتىمدىلىك ماسەلەلەرىنەن ەكى ەلدىڭ شەكارالاس تۇرعىندارى اراسىندا ءجيى قاقتىعىستار تۋىنداپ وتىرادى. ەڭ ءىرى قاقتىعىس 2022 جىلدىڭ 15-16 قىركۇيەگىندە بولعان. بۇل وقيعادان كوپتەگەن ادام زارداپ شەكتى. شامامەن 100 ادام قازا تاۋىپ، 150 مىڭنان استام تۇرعىن ۇيلەرىن تاستاپ كەتۋگە ءماجبۇر بولدى.
