امەريكالىق زەرتتەۋشى سۋ استىندا بولۋ ۇزاقتىعى بويىنشا كونەرگەن رەكوردتى جاڭارتتى. ول سۋ استىنداعى تىرشىلىگىن جالعاستىرىپ جاتىر. بۇل تۋرالى "ادىرنا" ۇلتتىق پورتالى ۆۆس ارناسىنا سىلتەمە جاساپ حابارلايدى.
فلوريدا شتاتى، كي-لارگو قالاسىنىڭ تۇرعىنى دجوزەف ديتۋري 30 فۋت تەرەڭدىكتەگى لاگۋنا تۇبىندە 74 كۇننەن استام ۋاقىت وتكىزدى.
ونىڭ سۋ استىندا ءومىر سۇرەتىن شاڭىراعى بار. تەڭىز تۇبىندەگى سول باسپاناسىندا كەم دەگەندە 100 كۇن بولاتىنىن ايتتى.
ء"بىرىنشى كۇننەن باستاپ كەلەشەك ۇرپاققا شابىت سىيلاپ، سۋ استىنداعى ءومىردى زەرتتەيتىن عالىمداردان سۇحبات العىم كەلدى. ادام اعزاسىنىڭ توتەنشە، قالىپتى تۇرمىستان تىس جاعدايلاردا قالاي جۇمىس ىستەيتىنىن ءبىلۋدى ماقسات ەتتىم", — دەدى عالىم.
وسىعان دەيىن سۋ استىندا ءومىر ءسۇرۋ بويىنشا رەكوردتى ەكى پروفەسسور 2014 جىلى ورناتقان ەدى. ولار دا كي-لارگو ۇيىندە 73 كۇن بولدى.
سۋ استىنداعى شاڭىراقتىڭ سۇڭگۋىر قايىقتان ايىرماشىلىعى، لودج جوعارى سۋ استى قىسىمىنا بەيىمدەلۋ ءۇشىن تەحنولوگيانى پايدالانبايدى.
"تەرەڭ تەڭىز دوكتورى" اتتى لاقاپ اتپەن تانىمال پروفەسسور ديتۋري ءوز ساياحاتىن 1 ناۋرىزدا باستادى. ول فلوريدا-كيس لاگۋنانىڭ تۇبىندە ورنالاسقان شاعىن بولمەگە جايعاسقان.
Project Neptune 100 دەپ اتالاتىن جوبا اياسىندا وڭتۇستىك فلوريدا ۋنيۆەرسيتەتىنىڭ پروفەسسورى ادام اعزاسىنىڭ توتەنشە جاعدايدا قالاي قۇبىلاتىنىن، ەكسترەمالدى قىسىمدا ۇزاق مەرزىم قالسا، قالاي وزگەرەتىنىن زەرتتەپ جاتىر.
زەرتتەۋشىلەر 55 جاستاعى ەر ادامنىڭ دەنساۋلىعىن، سونىمەن قاتار، ۇزاق ۋاقىت وقشاۋلانۋدىڭ پسيحولوگيالىق اسەرىن بىرقاتار مەديتسينا ادىستەمەلەرى ارقىلى زەرتتەيدى.
پروفەسسور سۋ استىندا ەش قيىندىق كورمەگەنىن ايتادى. ول شاكىرت باۋلۋ ءىسىن تەڭىز استىندا جاتىپ تا جالعاستىرىپ جاتىر. وڭتۇستىك فلوريدا ۋنيۆەرسيتەتىنىڭ مالىمەتى بويىنشا، پروفەسسور ونلاين سيپاتتا ستۋدەنتتەر ءۇشىن بيومەديتسينالىق ينجەنەريا ساباقتارىن جۇرگىزەدى.
پروفەسسور سۋ استىندا جاي جاتقان جوق. ەرتە، ساعات 05:00-دە ويانىپ، جاتتىعۋ جاسايدى. ول ميكروتولقىندى پەش كومەگىمەن جۇمىرتقا جىلىتىپ جەيدى. اقۋىزى مول تاعامداردى تۇتىنادى. دەگەنمەن ء"بىر كۇندىك ساۋلەنى" ساعىنعانىن دا جاسىرمادى.
"جەر بەتىندە ساعىنعان نارسەم بار. ول - كۇن", — دەيدى سۋ پاتشالىعىنىڭ تۇرعىنى.
"ادىرنا" ۇلتتىق پورتالى
