شىعىس قازاقستان وبلىسىندا قولادان قۇيىلعان لەنين ەسكەرتكىشىنىڭ تۇعىرىن جوندەلەتىن بولدى. بۇعان قاراجات اۋداندىق بيۋدجەتتەن قاراستىرىلعانى ءمالىم بولدى. مەردىگەر تابىلسا، جۇمىس بيىل باستالادى، - دەپ حابارلايدى "ادىرنا" ۇلتتىق پورتالى Massaget.kz-كە سىلتەمە كورسەتە وتىرىپ.
رەسمي مالىمەتكە سۇيەنسەك، ەسكەرتكىش قولادان قۇيىلعان. جۋىقتا اۋداندىق ءماسليحات سەسسياسىندا 2023 جىلعا بيۋدجەتتى ناقتىلاۋ كەزىندە "كۇن كوسەمنىڭ" مونۋمەنتىن جوندەۋ جاعى ءسوز بولدى. اۋداندىق ەكونوميكا جانە بيۋدجەتتى جوسپارلاۋ ءبولىمى باسشىسىنىڭ مالىمەتىنشە، بۇعان 1 ميلليون 449 مىڭ تەڭگە بولىنبەك. رەسمي مالىمەتكە سۇيەنسەك، ەسكەرتكىش 1962 جىلى بوي كوتەرىپتى.
"ەسكەرە كەتەتىن جايت، مونۋمەنتتىڭ ءوزىن ەمەس، تۇعىرىن جوندەۋ جوسپارلاندى. ۋاقىت وتكەن سايىن بىرتىندەپ توزا باستاعان. بىردە اياز، بىردە جىلىمىق اۋا رايى اسەر ەتپەي قويمادى. پليتالارىن الىپ، ونىڭ ورنىنا بەتون قۇيادى", – دەدى "شىگىس ستروي پروەكت" جشس باسشىسى سەرگەي وگرادوۆ.
لەنيننىڭ ەسكەرتكىشىن اسپەتتەگەن اكىمدىك سىنعا قالدى. اتالعان جاڭالىق ءاپ-ساتتە ءوڭىر تۇرعىندارى مەن جەلى قولدانۋشىلارىنىڭ نارازىلىعىن تۋعىزدى. وعان قارشى شىعىپ، ويىن اشىق بىلدىرگەندەر دە بولدى.
ء"ۇش ميلليون قازاقتى، جيىرما مىڭ زيالىنى قىرىپ تاستاعان قىزىلداردىڭ ءمۇسىنىن قۇلاتۋدى ەمەس، جوندەۋدى جوسپارلاپ وتىرعاندارىڭىز قىزىق ەكەن. ەندەشە ۇسىنىس بار، لەنيندى باسىن ءيدىرىپ، تىزەرلەتىپ قويىڭىزدار. مۇنداي مۇسىنىنە ەشكىم قارسى بولمايدى", – دەدى ارمان ادىلبەك الەۋمەتتىك جەلىدە.
نۇرسەرىك قاسىمجومارت "وزگە تۇركى حالىقتارىنان ۇيات قوي؟" دەپ كەلتە قايىردى. دەگەنمەن اۋدان اكىمىنىڭ ورىنباسارى جاننا اسقاروۆا قاراجات ءبولىنىپ قويعانىن العا تارتىپ وتىر. جانە ونىڭ التاي قالاسىنىڭ ورتالىق الاڭىن جوندەۋگە جۇمسالاتىنىن باسا ايتتى.
ء"يا، لەنين ەسكەرتكىشى ءالى تۇر. بىراق وسىدان ءۇش جىل بۇرىن ءبىز اۋدان مەن قالا اتىن التاي دەپ (التاي اۋدانى، التاي قالاسى) اۋىستىردىق. قاراجات الاڭدى جوندەۋگە ءبولىندى. بولاشاقتا وسى الاڭدى وزگەرتۋگە ۇلكەن جوبا دايىندالۋدا", – دەدى جاننا اسقارقىزى.
"ادىرنا" ۇلتتىق پورتالى
