Shyǵys Qazaqstan oblysynda qoladan quıylǵan Lenın eskertkishiniń tuǵyryn jóndeletin boldy. Buǵan qarajat aýdandyq bıýdjetten qarastyrylǵany málim boldy. Merdiger tabylsa, jumys bıyl bastalady, - dep habarlaıdy "Adyrna" ulttyq portaly Massaget.kz-ke silteme kórsete otyryp.
Resmı málimetke súıensek, eskertkish qoladan quıylǵan. Jýyqta aýdandyq máslıhat sessııasynda 2023 jylǵa bıýdjetti naqtylaý kezinde "kún kósemniń" monýmentin jóndeý jaǵy sóz boldy. Aýdandyq ekonomıka jáne bıýdjetti josparlaý bólimi basshysynyń málimetinshe, buǵan 1 mıllıon 449 myń teńge bólinbek. Resmı málimetke súıensek, eskertkish 1962 jyly boı kóteripti.
"Eskere ketetin jaıt, monýmenttiń ózin emes, tuǵyryn jóndeý josparlandy. Ýaqyt ótken saıyn birtindep toza bastaǵan. Birde aıaz, birde jylymyq aýa raıy áser etpeı qoımady. Plıtalaryn alyp, onyń ornyna beton quıady", – dedi "Shygys Stroı Proekt" JShS basshysy Sergeı Ogradov.
Lenınniń eskertkishin áspettegen ákimdik synǵa qaldy. Atalǵan jańalyq áp-sátte óńir turǵyndary men jeli qoldanýshylarynyń narazylyǵyn týǵyzdy. Oǵan qarshy shyǵyp, oıyn ashyq bildirgender de boldy.
"Úsh mıllıon qazaqty, jıyrma myń zııalyny qyryp tastaǵan qyzyldardyń músinin qulatýdy emes, jóndeýdi josparlap otyrǵandaryńyz qyzyq eken. Endeshe usynys bar, Lenındi basyn ıdirip, tizerletip qoıyńyzdar. Mundaı músinine eshkim qarsy bolmaıdy", – dedi Arman Ádilbek áleýmettik jelide.
Nurserik Qasymjomart "Ózge túrki halyqtarynan uıat qoı?" dep kelte qaıyrdy. Degenmen aýdan ákiminiń orynbasary Janna Asqarova qarajat bólinip qoıǵanyn alǵa tartyp otyr. Jáne onyń Altaı qalasynyń ortalyq alańyn jóndeýge jumsalatynyn basa aıtty.
"Iá, Lenın eskertkishi áli tur. Biraq osydan úsh jyl buryn biz aýdan men qala atyn Altaı dep (Altaı aýdany, Altaı qalasy) aýystyrdyq. Qarajat alańdy jóndeýge bólindi. Bolashaqta osy alańdy ózgertýge úlken joba daıyndalýda", – dedi Janna Asqarqyzy.
"Adyrna" ulttyq portaly
