نەمەسە قىتاي - قازاق جانجالى كىمدەرگە ءتيىمدى؟
1..اقش-تا تۇراتىن ديسسيدەنت، ۇيعىر حالقىنىڭ ۇلت-ازاتتىق كۇرەسىنىڭ جەتەكشىسى - رابيا قادىر حانىمعا ءتيىمدى!
ول بۇل كۇرەسكە وزدەرىنىڭ دەربەس مەملەكەتى بار قازاقتاردى ارالاستىرا السا، وندا ۇيعىرلاردىڭ ۇلت-ازاتتىق كۇرەسى قىتاي مەملەكەتىنىڭ ىشكى ەمەس، حالىقارالىق دەڭگەيدەگى ماسەلەگە اينالار ەدى! رابيا حانىمنىڭ ارمانى - ۇيعىر ۇلتىنىڭ باسىنداعى وتتى قازاقتىڭ باسىنا اۋىستىرۋ! بۇل ءۇشىن ول بارىن سالىپ، وتە جاقسى دايىندىق جاساعان ەكەن. ءوزىنىڭ كينوفابريكاسىندا جاسالىنعان، جان تۇرشىگەرلىك نەشە ءتۇرلى ۆيدەوروليكتەردى، قىتايداعى «ساياسي ۇيرەنۋ مەكتەبىندە» بولىپ جاتقان ازاپتاۋ وقيعالارى دەپ، الەمگە، اسىرەسە قازاقستانعا اقپارات تاراتىپ، ونى قىتايداعى قازاقتاردىڭ تاعدىرىمەن بايلانىستىرا العانى - رابيا حانىم كۇتكەندەي ناتيجە بەردى دەپ ويلايمىن! دالەلى - قازاق قوعامىنداعى بۇگىنگى ورىن العان دۇربەلەڭ! اسىرەسە وڭاي جازىلماسى بەلگىلى - ورالمان، جەرگىلىكتى بولىپ قازاقتاردىڭ ەكىگە جارىلعانى مەن ۇلتىمىزدىڭ ابزال اقساقالدارى، ۇلتشىلدارىنا جاعىلعان كۇيە! مۇنى رابيا حانىمنىڭ قازاقستان بيلىگىىندەگى ادامدارى مەن قازاق قوعامىنا الدىن الا دايىندالعان، تاماشا ساياسي تەحنولوگيامەن ەنگىزىلگەن - جالدامالى بەلسەندىلەرى ۇرلەپ ءورشىتىپ وتىردى. وسىنىڭ سالدارىنان، ءتىپتى قۇجاتتارىنا «قازاقپىن» دەپ جازۋعا كەلىسكەن ۇيعىردىڭ ءبارىن ەلىمىزگە قابىلداي بەرەيىك دەگەن قازاقتار دا شىقتى. ال بۇعان سوڭعى ۋاقىتتا پايدا بولعان «ءسابي ساياساتكەرلەردىڭ» پارمەندى اتسالىسۋلارى مەن جاعدايدان بەيقابار قاراپايىم كوپشىلىكتىڭ ەشتەڭە تۇسىنبەي قولداي كەتۋى - مەملەكەتىمىزدى شىنىمەن-اق قاۋىپكە تىرەپ قويۋى ابدەن مۇمكىن. وسىنداي كوپشىلىكتىڭ ەشتەڭە تۇسىنبەي بىرەۋلەردى قولداي كەتۋى سالدارىنان قازاق مۇددەسىنە كەرەعار - جاڭا جەر كودەكسى قابىلدانىپ كەتكەنى بەلگىلى.
2. اقش-قا ءتيىمدى.
ولاردىڭ قازاقستانعا دەگەن قىزىعۋشىلىعى قىرعىزستانداعى اقش «ماناس» اسكەري-اۋا بازاسى جابىلعاننان كەيىن، ەسەلەپ ءوستى. امەريكانىڭ ەندىگى ارمانى - قازاقستاندا قازىرگى سيرياداعىداي جاعداي ورناتىپ، سوعان پارمەندى تۇردە «ءادىل بي» رەتىندە قويان-قولتىق ارالاسۋ! وسى جاعدايدا، «ەكى قارسىلاسىنىڭ ەكى بۇيىرىنە قانجارىنىڭ ءۇشىن تاقاپ قويىپ»، قىتايعا قىسىمىن ارتتىرسا، رەسەيگە دەگەنىن جاساتۋ!
3. رەسەيگە ءتيىمدى!
قازاق قىتايدان قورقىپ، ورىستىڭ قولتىعىنا، ءوز ەركىمەن، كىرەر ەدى. بۇگىنگى بەلارۋستەر سياقتى.
4. ءتىپتى، بۇنداي جاعداي، قىتايدىڭ وزىنە دە ءتيىمدى!
تاجىكستاننىڭ تاۋلى-باداحشان ايماعى سياقتى قازاقستاننىڭ الماتىعا دەيىنگى جەرىن وزدەرىنە قوسىپ الاتىن مۇمكىندىك تۋى عاجاپ ەمەس!
مىنە، قاراپ وتىرساق، قىتاي-قازاق جانجالى نەشە ءبىر الپاۋىت مەملەكەتتەرگە ءتيىمدى ەكەن! وندا نەگە ولار بۇل جانجالدى وسى ۋاقىتقا دەيىن جاسامادى؟ امەريكا - قازاقتى دەموكراتيالىق ەل ەتەيىن، قىتاي - قازاقتى باي كورشى ەتەيىن، ال رەسەي - بۇرىنعى ادال دوس دەپ، جانى اشىپ وتىر ما؟ جوق!
ولاردىڭ بىردە-بىرەۋىندە وزدەرىنىڭ دىتتەگەن ماقساتتارىنا تولىق جەتە الامىن دەگەن كەپىلدىگى عانا جوق! مىنە، قازاقتى قۇتقارىپ وتىرعان وسى عانا!
تاپ بۇگىنگى ساتتە بىزگە ەڭ قاۋىپتىسى - رابيا حانىمنىڭ ويىنى! بۇل جاعدايدا جوعارىدا جازىلعان ءۇش مەملەكەتتە ءبىر-ءبىرىن ايىپتاي المايدى! باستاعان ولار ەمەس. ول كەزدە باستاعان - قازاقتىڭ ءوزى بولادى! ۇشەۋى دە ءوز «ەنىشتەرىن» الىپ قالادى. سوندىقتاندا، بۇل ءۇش مەملەكەتتىڭ بارلاۋ قۇرىلىمدارى، جاعدايدى سىرتتان باقىلاپ، ارالاسپاي، بەيتاراپ وتىر. بولماسا، رابيا حانىمنىڭ سەپاراتيستىك ارەكەتىن جويا سالۋ ولارعا تۇككە تۇرمايدى. ال ءبىزدىڭ بارلاۋ قۇرىلىمدارىمىز ءۇشىن حالىقارالىق ورتاشا قۋاتتى سەپاراتيستىك توپ - الىنبايتىن قامال ەكەن! بۇل ءبىزدىڭ جەمقورلىقپەن ابدەن شىرىگەن جۇيەمىزدىڭ قورعانۋ دارەجەسىنىڭ كورسەتكىشى!
گەرويحان قىستاۋباەۆ
