شىمكەنتتىڭ بۇرىنعى اكىمى عابيدوللا ءابدىراحىموۆ Samruk-Kazyna Construction اق باسقارما توراعاسىنىڭ پايدالانۋ جونىندەگى ورىنباسارى بولىپ تاعايىندالدى، دەپ حابارلايدى "ادىرنا".
ءبىراز ۋاقىتتان بەرى كورىنبەي كەتكەن اكىم كۇنى كەشە تۇركىستان وبلىسىندا 1000 مۆت قۋاتتىلىقتاعى بۋ-گاز ەلەكتر ستانتسياسىن سالۋ ماسەلەسى بويىنشا جۇمىسقا قاتىستى كەزدەسۋدە بوي كورسەتتى.
ءىس-شارادان فوتوسۋرەتتەر مەن بەينەلەر ccgt_turkistan Instagram-پاراقشاعا جۇكتەلدى. بۇل «سامۇرىق-قازىنا» اق-عا ەنشىلەس «Turkestan CCGT» جشس-ءنىڭ رەسمي پاراقشاسى. جازبادا «سامۇرىق-قازىنا قۇرىلىس» اق باسقارما توراعاسىنىڭ وپەراتسيالار جونىندەگى ورىنباسارى عابيدوللا ءابدىراحىموۆ جانە كومپانيا باسشىلىعى قۇرىلىس الاڭىنا جۇمىس ساپارىمەن بارىپ، ستراتەگيالىق جوبانىڭ بارىسىن قاراپ شىققانى ايتىلعان. الايدا، كومپانيانىڭ رەسمي سايتىندا جاڭا تاعايىندالۋ تۋرالى ەشقانداي اقپارات جوق.
عابيدوللا ءابدىراحىموۆ مەملەكەتتىك قىزمەتكە ءتورت جىلعا جۋىق ۇزىلىستەن كەيىن قايتا ورالدى. ونىڭ سوڭعى اتقارعان جوعارى لاۋازىمى 2021 جىلدىڭ قاڭتار-قىركۇيەك ايلارى ارالىعىنداعى مادەنيەت جانە سپورت ۆيتسە-ءمينيسترى قىزمەتى بولاتىن.
شەنەۋنىك بۇعان دەيىن شىمكەنت قالاسىنىڭ اكىمى رەتىندە كەڭىنەن تانىلدى. الايدا 2019 جىلى لوندونداعى پيكاديللي كوشەسىندە تۇسىرگەن ۆيدەوسى قوعامدا ۇلكەن سىنعا يە بولىپ، ارتىنشا ول «ساياسي سەنىم تاۋسىلدى» دەگەن تۇجىرىممەن قىزمەتىنەن بوساتىلدى. سونداي-اق ءابدىراحىموۆ ارىستاعى جارىلىستان كەيىن نارازىلىققا شىققان تۇرعىندارمەن كەزدەسۋدە ەر ادامداردى «ايەلدەرىنە يە بولۋعا» شاقىرىپ، داۋلى مالىمدەمە جاساعان بولاتىن. 20 جىلدان استام مەملەكەتتىك قىزمەت تاجىريبەسى بار ول ءار جىلدارى پرەزيدەنت اكىمشىلىگى مەن ۇكىمەتتە ءتۇرلى باسشىلىق لاۋازىمداردى اتقارعان.
2023 جىلدىڭ باسىندا عابيدوللا ءابدىراحىموۆتىڭ ۇستىنەن قىلمىستىق ءىس قوزعالىپ، تەرگەۋ ماتەريالدارى سىبايلاس جەمقورلىققا قارسى ءىس-قيمىل اگەنتتىگىنە بەرىلگەنى ءمالىم بولدى. بۇعان دەيىن اتالعان ءىستى الماتى قالالىق پوليتسيا دەپارتامەنتى «الاياقتىق» بابى بويىنشا تەرگەگەن.
