الكەي مارعۇلاننىڭ جەكە مۇراعاتىنان مومىشۇلىنىڭ قولجازباسى بار كارتا انىقتالدى

6281
Adyrna.kz Telegram

ءا.مارعۇلان اتىنداعى پاۆلودار پەداگوگيكالىق ۋنيۆەرسيتەتىنىڭ تاريحشىلارى كەڭەس وداعىنىڭ باتىرى، حالىق قاھارمانى باۋىرجان مومىشۇلىنىڭ الكەي مارعۇلانعا تابىستاپ كەتكەن كارتاسىن انىقتادى. تاريحي قۇجات اكادەميكتىڭ جەكە مۇراعاتىنان تابىلعان.  بۇل تۋرالى بۇگىن مارعۇلان ۋنيۆەرسيتەتىندە وتكەن كونفەرەنتسيا بارىسىندا Margulan Centre ارحەولوگيالىق ورتالىعىنىڭ قىزمەتكەرى ەڭلىك ابەۋوۆا بايانداما جاساپ، العاش رەت كوپشىلىك قاۋىمعا جاريالادى.

كارتادا شىمكەنت وبلىسىنىڭ 1972 جىلعى اكىمشىلىك تەرريتورياسى كورسەتىلگەن. اتالعان تاريحي قۇجاتتى حالىق قاھارمانى اكادەميك الكەي مارعۇلانعا 1973 جىلدىڭ جەلتوقسان ايىندا بەرگەن. مىنە، سودان بەرى جارتى عاسىر ۋاقىت ءوتتى.

كارتانىڭ باستى بەتىنە باۋىرجان مومىشۇلى ءوز قولىمەن:

«تارازىدا تاستاريا،

سايرامداعى سانسىزباي،

ارىستاندا الباربارىس،

جۋالىدا جولبارىس،

تۇركىستاندا تۇيمەنباپ» – دەگەن سوزدەر بار ءبىزدىڭ ەلدە، سول سوزدەردىڭ تاريحتارى تەرەڭ، استارلارى جەر استىندا (ارحەولوگيا) جاتقان بولار» - دەپ جازىپ قويعان. ال كارتانىڭ ارتقى بەتىنە سىزبا مەن ونىڭ قىسقاشا انىقتاماسىن كەلتىرگەن، ياعني اتا-بابالارى بويىنشا اقپارات بەرىلگەن.

-بۇل قۇجاتتىڭ بۇگىنگى تاڭدا تاريحي ماڭىزى وتە زور. سەبەبى 60-تان اسىپ، 70-كە تاياعان كەزدەگى ەكى تاۋ تۇلعانىڭ اراسىنداعى قارىم-قاتىناسى، تۋعان جەرىنە، تاريحىنا دەگەن ىقىلاسى سەزىلىپ تۇر. باۋىرجان مومىشۇلى جەر اتاۋلارى مەن باتىر بابالارى بويىنشا اقپاراتپەن بولىسە وتىرىپ، ءارى قاراي زەرتتەۋگە، تاريحتى زەردەلەۋگە، جاڭا ماعلۇماتتار الۋعا قولقا سالىپ وتىرعانداي، - دەيدى ەڭلىك قابىكەنقىزى.

 

پىكىرلەر