الماتى اكىمى باۋىرجان بايبەك مەملەكەت باسشىسىنىڭ "نۇر وتان" پارتياسىنىڭ XVIII سەزىندە ايتىلعان حالىقتىڭ از قامتىلعان توبىنا، ونىڭ ىشىندە كوپبالالى انالارعا قولداۋ كورسەتۋ جونىندەگى تاپسىرماسىن ورىنداۋ بويىنشا قالالىق جوسپاردى تانىستىردى. مەگاپوليس باسشىسى ول ءۇشىن جەرگىلىكتى بيۋدجەتتەن 5,5 ملرد. تەڭگەدەن استام قارجى بولىنەتىنىن اتاپ ءوتتى، - دەپ حابارلايدى تengrinews.kz ءتىلشىسى الماتى اكىمدىگىنىڭ ءباسپاسوز قىزمەتىنە سىلتەمە جاساپ.
"مەملەكەت باسشىسى اتاپ وتكەندەي، ءاربىر قازاقستاندىق وتباسى رەفورما ناتيجەسىن بولاشاقتا ەمەس، ءدال قازىر سەزىنۋلەرى ءتيىس. از قامتىلعان ازاماتتاردىڭ تابىسىن كوتەرۋ، باسپاناعا، ساپالى ءبىلىم مەن دەنساۋلىققا قولجەتكىزۋلەرى جانە وڭىرلەردى دامىتۋ ءۇشىن پرەزيدەنت قوسىمشا 2 تريلليون تەڭگە ءبولۋدى تاپسىردى. پرەزيدەنت العا قويعان الەۋمەتتىك ماسەلەلەردى ساپالى ورىنداۋ ءۇشىن الماتىدا ناقتىلى شارالار جوسپارى، ونىڭ ىشىندە "باقىتتى وتباسى" قالالىق الەۋمەتتىك باعدارلاماسى جاسالدى. بۇل - جەڭىلدەتىلگەن تۇرعىن ءۇي يپوتەكاسى، وقۋشىلار مەن ستۋدەتتەردىڭ ستيپەندياسى، الەۋمەتتىك جانە بىررەتتىك تولەمدەر، جۇمىسپەن قامتۋ جانە باسقالارى. جالپى، حالىقتىڭ از قامتىلعان توبىنا، ونىڭ ىشىندە كوپبالالى وتباسىلارعا كەشەندى قولداۋ كورسەتۋ ءۇشىن 5,5 ملرد. تەڭگەدەن استام قارجى بولىنەدى", - دەدى باۋىرجان بايبەك.
ەندى 11 ناۋرىزدان باستاپ "باقىتتى وتباسى" ارنايى قالالىق تۇرعىن ءۇي باعدارلاماسى بويىنشا قۇجاتتار قابىلدانادى. العاشقى جارنا تۇرعىن ءۇي قۇنىنىڭ 10 پايىزىن قۇرايدى، مولشەرلەمە - 2 پايىز. كەزەكتە تۇرعان 1276 كوپبالالى جانە تولىق ەمەس وتباسىلاردىڭ العاشقى جارنانى تولەۋگە قاراجاتتارى جوق بولعاندىقتان قالا بيۋدجەتىنەن 1 ميلليون تەڭگەنىڭ تۇرعىن ءۇي سەرتيفيكاتتارى بولىنەدى.
الماتىنىڭ كوپبالالى وتباسىلارى ءۇشىن ەكىنشى بالاسىنان باستاپ بالا باقشا تەگىن بولادى. 20 ناۋرىزدان باستاپ از قامتىلعان وتباسىلاردىڭ 4 مىڭعا جۋىق وقۋشىلارىنا العاش رەت ستيپەنديا تولەنەدى. مەكتەپ وقۋشىلارى اي سايىن 5 مىڭ تەڭگەدەن، ال ۋنيۆەرسيتەتتەر مەن كوللەدجدەر ستۋدەنتتەرى 10 مىڭ تەڭگەدەن الادى.
قيىن جاعدايعا دۋشار بولعاندارعا بەرىلەتىن بىررەتتىك تولەم كولەمى 25 مىڭنان 50,5 مىڭ تەڭگەگە كوبەيەدى. 15 ناۋرىزدان باستاپ جاردەماقى كولەمى ارتىپ، 5 مىڭعا جۋىق ادامدى قامتيدى. 15 ناۋرىزدان باستاپ از قامتىلعان وتباسىلارعا ىستىق جانە سۋىق سۋ ەسەپتەگىش قۇرالدارىن جەكە ورناتۋعا بەرىلەتىن جاردەماقى كولەمى 70 پايىزعا نەمەسە 5 مىڭنان 8,6 مىڭعا وسەدى. بۇلاردان وزگە، از قامتىلعاندار توبىنا كوممۋنالدىق قىزمەتكە كەتەتىن شىعىننىڭ ورنىن تولتىرۋ ءۇشىن بەرىلەتىن جاردەماقى كولەمى 5 پايىزعا دەيىن ارتادى.
1 ناۋرىزدان الماتىداعى جۇمىسسىز انالاردى وقىتۋ جانە كاسىبي دايىنداۋ شارالارى باستالدى ءارى ولارعا 16,7 مىڭ تەڭگە كولەمىندە ستيپەنديا بەرىلەدى. قالادا جاستار پراكتيكاسى، سۋبسيديا ءبولىپ جۇمىسپەن قامتۋ، جالاقىسى 63 مىڭ تەڭگەلىك الەۋمەتتىك جۇمىسقا تارتۋ شارالارى ۇيىمداستىرىلۋدا.
ءبىر تەرەزە قاعيداسى بويىنشا جۇمىس جاسايتىن كوپبالالى انالار ورتالىعىندا قۇقىقتىق جانە پسيحولوگيالىق كەڭەستەر بەرىلەدى، رەابيليتاتسيالىق كومەك كورسەتىلەدى، ورتالىق 1 ساۋىردەن باستاپ ەسىگىن اشادى. مۇندا كوپبالالى انالار ەڭبەكپەن قامتىلادى، ميني - بالا باقشالار ۇيىمداستىرىلادى.
قالالىق الەۋمەتتىك ءال-اۋقات باسقارماسىنىڭ باسشىسى راحات شيماشەۆا مەگاپوليستە "نۇرلى جەر" باعدارلاماسى بويىنشا جالعا بەرىلەتىن، ونىڭ ىشىنە كوپبالالى وتباسىلار دا كىرەدى، 40 مىڭنان استام پاتەرلەر قۇرىلىسى باستالاتىنىن ايتتى. اتاۋلى الەۋمەتتىك كومەك كولەمىن كۇن كورىس كورسەتكىشىنەن 70 پايىزعا دەيىن كوتەرۋ بارىسىندا الماتىدا ونى الاتىندار سانى 2 699 دان 4000 ادامعا ءوستى. مۇگەدەك بالالاردى تاربيەلەۋشىلەرگە بەرىلەتىن تولەم كولەمى 31,1 مىڭنان 41,6 مىڭعا ارتتى. بۇل شارا 7 394 ادامدى قامتيدى. مەملەكەت باسشىسىنىڭ تاپسىرماسى بويىنشا الماتىنىڭ بيۋدجەتتىك سالاسىنداعى 30 مىڭنان استام قىزمەتكەرلەردىڭ جالاقىسىن 30 پايىزعا دەيىن كوتەرۋ جوسپارلانعان
