- مەرەكە قۇلكەنوۆ - قازاقستان جازۋشىلار وداعىنىڭ توراعاسى.
باسقا كانديدات بولعان جوق...
نۇرجان قۋانتاي - ءبىرىنشى ورىنباسارى.
باۋىرجان جاقىپ - ەكىنشى ورىنباسارى.
قاسىمحان بەگمانوۆ - ءۇشىنشى ورىنباسارى.
عالىم قاليبەك - ءتورتىنشى ورىنباسارى.
بەيبىت سارىباي - بەسىنشى ورىنباسارى، - دەپ جازدى.
بەس جىلدا ءبىر رەت وتەتىن جيىندا الدىمەن قر اقپارات جانە قوعامدىق دامۋ ءمينيسترى دارحان قىدىرالى مەملەكەت باسشىسى قاسىم-جومارت توقاەۆتىڭ جازۋشىلارعا قۇتتىقتاۋىن جەتكىزدى.
قازاقستان جازۋشىلار وداعىنىڭ باسقارما توراعاسى، اقىن، مەملەكەتتىك سىيلىقتىڭ لاۋرەاتى ۇلىقبەك ەسداۋلەت بەس جىلدا اتقارىلعان جۇمىستار جونىندە ەسەپتىك بايانداما جاسادى.
ۇلىقبەك ەسداۋلەت ءوزىنىڭ 15 ەلدىڭ قالامگەرلەرى مۇشە رەتىندە كىرگەن تۇركى دۇنيەسى جازۋشىلار وداعىنىڭ توراعاسى بولىپ سايلانۋىنا بايلانىستى قىزمەتىنەن كەتەتىنىن مالىمدەدى.
جيىندا سونداي-اق مەملەكەتتىك سىيلىقتىڭ لاۋرەاتتارى، جازۋشىلار دۋلات يسابەكوۆ، كادىربەك سەگىزباەۆ، اقىن-دراماتۋرگ يرانبەك ورازباەۆ، ءماجىلىس دەپۋتاتى، اقىن قازىبەك يسا جانە باسقالار ءسوز الىپ، ادەبيەتتىڭ تولعاقتى ماسەلەلەرىنە توقتالدى.
قۇرىلتايدان سوڭ باسقارما جيىنىندا جازۋشى، قازاقستاننىڭ ەڭبەك سىڭىرگەن قايراتكەرى مەرەكە قۇلكەنوۆ قازاقستان جازۋشىلار وداعى باسقارما توراعاسى بولىپ سايلاندى. سونداي-اق ونىڭ ورىنباسارلارى بەلگىلى بولدى.
ايتا كەتەيىك، قالامگەر-جۋرناليست مەرەكە ابدەشۇلى قۇلكەنوۆ 1951 جىلى 8 قاراشادا اتىراۋ وبلىسى، قىزىلقوعا اۋدانى، قاراباۋ اۋىلىندا تۋعان. قازاقستاننىڭ ەڭبەك سىڭىرگەن قايراتكەرى، قازاقستان جازۋشىلار وداعىنىڭ مۇشەسى، الماتى قالالىق ءماسليحاتىنىڭ دەپۋتاتى. قازاقستان رەسپۋبليكاسى پرەزيدەنتى سىيلىعىنىڭ لاۋرەاتى.
س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ (قازىرگى ءال-فارابي اتىنداعى قازاق ۇلتتىق ۋنيۆەرسيتەتى) جۋرناليستيكا فاكۋلتەتىن بىتىرگەن (1978). بىرنەشە كىتاپتىڭ اۆتورى. سولاردىڭ ءبىرى — راحىمجان وتارباەۆپەن بىرلەسىپ جازعان «باس» دراماسى ءۇشىن مادەنيەت مينيسترلىگى جاريالاعان «بايتەرەك» رەسپۋبليكالىق بايكاۋىندا ەكىنشى جۇلدەگە يە بولدى (2004 ج.).
1970 جىلى اسكەري بورىشىن وتەپ كەلگەننەن كەيىن 1971 — 1973 جىلدارى قازاقستان كومپارتياسى ورتالىق كوميتەتىنىڭ گازەت-جۋرنال باسپاسى باسپاحاناسىندا باسپاگەردىڭ كومەكشىسى بولدى. ۋنيۆەرسيتەتتى بىتىرگەن سوڭ بۇقارالىق اقپارات قۇرالدارىندا «قازاقستان پيونەرى» گازەتى، قازاقستان تەلەارناسى، «پيونەر» جۋرنالى، «قازاق ادەبيەتى» گازەتىنىڭ ءتىلشىسى،
1993-1997 جىلدار ارالىعىندا «جالىن» رەسپۋبليكالىق قوعامدىق-ادەبي جۋرنالىنىڭ باس رەداكتورى،
1997 جىلدان بەرى «انا ءتىلى» رەسپۋبليكالىق گازەتىنىڭ، 2000 جىلدان وسى ۋاقىتقا دەيىن «تاڭ-شولپان» ادەبي-كوركەم، كوپشىلىك جۋرنالىنىڭ باس رەداكتورى،
1991 جىلدان قازىرگى كۇنگە دەيىن «ولكە» باسپاسىنىڭ باس ديرەكتورى بولىپ ەڭبەك ەتىپ كەلەدى. سونداي-اق «جۇلدىز» جۋرنالىنىڭ باس رەداكتورى قىزمەتىن قوسا اتقارۋدا.
«قۇرمەت» وردەنىمەن، ۇلتتىق جۋرناليستىك سىيلىق «التىن جۇلدىز» ت.ب. بىرنەشە مەدالدارمەن ماراپاتتالدى.
