ساياسي ناۋقاندا باق سىناپ، ەل باسشىسى اتانۋعا تالپىناتىن جيگۋلي دايراباەۆتىڭ اتاعى جەر جارىپ تۇر. بۇل جايلى ۇمىتكەر شتابىنىڭ جەتەكشىسى تولەۋتاي راحىمبەكوۆ ايتتى. ول ۇگىت-ناسيحات جۇمىستارىنىڭ قارقىنى جايلى وتاندىق تەلەارنالاردىڭ بىرىنە سۇحبات بەردى، دەپ حابارلايدى "ادىرنا" ۇلتتىق پورتالى.
جيگۋلي دايراباەۆقا قاراستى رەسپۋبليكالىق-قوعامدىق شتاب جەتەكشىسى تولەۋتاي راحىمبەكوۆتىڭ سوزىنە سەنسەك، ۇگىت-ناسيحات جۇمىسى قىزۋ ءجۇرىپ جاتىر. كانديداتتىڭ تىكەلەي قاتىسۋىمەن التى وڭىردە كەزدەسۋ وتسە، كانديداتتىڭ سەنىمدى وكىلدەرىنىڭ قاتىسۋىمەن مۇنداي جۇمىس قازاقستاننىڭ بۇكىل ەلدى-مەكەنىن قامتىعان.
تولەۋتاي راحىمبەكوۆ "اۋىل" پارتياسىنىڭ سايلاۋعا دايىندىقتى الدىڭعى سايلاۋ وتە سالىسىمەن، ياعني 2019 جىلعى 19 ماۋسىمدا باستاپ كەتكەنىن دە اتاپ ءوتتى.
"اۋىل پارتياسى" اۋىلدار مەن اۋىل شارۋاشىلىعىنىڭ عانا ماسەلەسىن شەشپەيدى، باسقا دا ازاماتتاردىڭ، قالا تۇرعىندارىنىڭ دا ماسەلەسىنە نازار اۋدارادى. قالا حالقىنىڭ دا، اۋىل حالقىنىڭ دا كوتەرىپ وتىرعان ماسەلەلەرىنە قاراپ، دۇرىس جولمەن كەلە جاتىرمىز دەپ ەسەپتەيمىز، - دەدى تولەۋتاي راحىمبەكوۆ.
ول سونداي-اق "اۋىل" پارتياسىنىڭ اتىنان پەرزيدەنتتىككە كانديدات ۇسىنىلار كەزدە تەرەڭ تالقىلاۋ، ۇزاق پىكىرتالاس بولعانىن جەتكىزدى. اقىرىندا ومىرلىك تاجىربيەسى مول، كەز كەلگەن ماسەلەنى شەشۋ جولدارىن جاقسى بىلەتىن جيگۋلي دايراباەۆتىڭ ۇسىنىلعانىن ايتتى. ونىڭ ايتۋىنشا، جيگۋلي دايراباەۆ ساياساتتاعى كولدەنەڭ كوك اتتى ەمەس، ياعني جاڭا كەلگەن ادام ەمەس، ساياساتتا وتىز جىلدان بەرى جۇرگەن ادام.
ورايى كەلگەندە ايتا كەتەيىك، جيگۋلي مولداقالىقۇلى «اۋىلدان شىقتىق» ۇرانىمەن ساياسات مايداندا كۇرەسكە ءتۇسىپ جاتىر.
"ادىرنا" ۇلتتىق پورتالى
