“استىن قازىپ كىرگەن”. اقمولا وبلىسىندا زەرگەرلىك دۇكەندى توناپ كەتكەن كۇدىكتىلەر ۇستالدى

1381
Adyrna.kz Telegram

ستەپنوگورسك قالاسىنداعى زەرگەرلىك دۇكەننىڭ استىن قازىپ، توناپ كەتكەن قوس كۇدىكتى استانادا قولعا ءتۇستى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى. 

"مامىردىڭ 1-ءى كۇنى ستەپنوگورسك قالاسىندا ەكى ازامات زەرگەرلىك دۇكەننىڭ جەرتولە قاباتىنا قازىپ كىرىپ، 180 ميلليون تەڭگە بولاتىن اشەكەي زاتتاردى قولدى قىلعان. بۇل دەرەككە قاتىستى قك 188 بابىنىڭ 4 ءبولىمى بويىنشا سوتقا دەيىنگى تەرگەۋ-تەكسەرۋ باستالدى. پوليتسيا دەپارتامەنتى باسشىلىعىنىڭ ۇيعارىمىمەن اقمولا وبلىسىندا جانە ىرگەلەس وڭىرلەردىڭ اۋماعىندا جەدەل ىزدەستىرۋ جۇمىستارى ۇيىمداستىرىلدى", - دەيدى پوليتسيا قىزمەتكەرلەرى. 

ناتيجەسىندە استانا قالاسىندا ەلوردانىڭ 1977 جانە 1988 جىلى تۋعان تۇرعىندارى قولعا ءتۇستى. ولاردان زاتتاي ايعاق رەتىندە تەلەفون، قۇرال-سايماندار مەن كولىكتەرى تاركىلەنگەن.

قىلمىستىق ءىستى زەرتتەۋ ءالى جالعاسۋدا، كۇدىكتىلەر قاماۋعا الىندى. ولار ستەپنوگورسك قالالىق بازارىنىڭ ماڭىنداعى زەرگەرلىك دۇكەنگە ۇرلىققا تۇسكەن. الەۋمەتتىك جەلىلەردە تارالعان بەينەجازباعا قاراعاندا، ۇرلىقشىلار دۇكەنگە كىرەبەرىستەگى باسپالداقتىڭ استىنان ويىپ ەنگەن. 

"ۆيترينالاردى تىپ-تيپىل ەتكەن. شىعىن مولشەرى جۇزدەگەن ميلليون تەڭگە. بۇل بەيرەسمي اقپارات", - دەلىنگەن الەۋمەتتىك جەلىدەگى جازبادا. 

پىكىرلەر