پرەزيدەنت قاسىم-جومارت توقاەۆ پەن قحر توراعاسى سي تسزينپين جۇرگىزگەن كەلىسسوز ناتيجەسىندە 24 ۇكىمەتارالىق جانە ۆەدومستۆوارالىق قۇجاتقا قول قويىلدى. بۇل تۋرالى اقوردا جازدى، دەپ حابارلايدى "ادىرنا".
توقاەۆ قازاقستان مەن قىتاي اراسىنداعى ەكىجاقتى قارىم-قاتىناس جىلدان جىلعا نىعايىپ، جاڭا "التىن كەزەڭگە" قادام باسقانىن مالىمدەدى. دوستىق بايلانىس ەكى ەلدىڭ تۇراقتى الەۋمەتتىك-ەكونوميكالىق دامۋىنا جانە حالىقتاردىڭ ءال-اۋقاتىن جاقسارتۋعا زور سەپتىگىن تيگىزىپ جاتقانىنا نازار اۋداردى. سونداي-اق پرەزيدەنت قحر توراعاسىنىڭ ەلىمىزگە ساپارى ونىڭ تۋعان كۇنىمەن تۇسپا-تۇس كەلگەنىن ايتىپ، سي ءتسزينپيندى تۋعان كۇنىمەن قۇتتىقتادى.
پرەزيدەنت قىتايدى قازاقستاننىڭ تاتۋ كورشىسى جانە ۋاقىت تەزىنەن وتكەن سەنىمدى ستراتەگيالىق سەرىكتەسى دەپ اتادى.
“قىتاي قازاقستانمەن اراداعى ىنتىماقتاستىعىندا قانداي دا ءبىر ساياسي شارت قويماعان. ءبىزدىڭ ەگەمەندىگىمىز بەن قاۋىپسىزدىگىمىزگە كورسەتكەن قولداۋىڭىزدى باعالايمىز. قىتايدىڭ بەيبىتشىلىك باستامالارىن قولدايمىز. ەلىڭىزدىڭ ءادىل الەمدىك ءتارتىپ ورناتۋ ارەكەتتەرىن قۋاتتايمىز”، – دەدى توقاەۆ.
قاسىم-جومارت توقاەۆ ەكى ەلدىڭ بۇۇ، شىۇ، اوسشك سەكىلدى حالىقارالىق جانە وڭىرلىك ۇيىمدار اياسىندا، سونداي-اق بريكس + جانە "ورتالىق ازيا – قىتاي" فورماتىندا جوعارى دەڭگەيدەگى ىقپالداستىق ورناتقانىن اتاپ ءوتتى.
مەملەكەت باسشىسى قحر-دىڭ قازاقستاننىڭ ەڭ ءىرى ساۋدا-ەكونوميكالىق سەرىكتەسى ەكەنىن ەسكە سالدى. بىلتىرعى قورىتىندى بويىنشا ەكىجاقتى ساۋدا-ساتتىق كولەمى 44 ميلليارد دوللارعا جەتكەن. بۇل – رەكوردتىق كورسەتكىش. سونىمەن قاتار 2025 جىل "قازاقستانداعى قىتاي ءتۋريزمىنىڭ جىلى" بولىپ جاريالاندى.
توقاەۆ اتوم ەنەرگەتيكاسى سالاسىنا ارنايى توقتالدى.
ء“بىز قازاقستاندا بىرنەشە، تىم بولماعاندا ەكى-ءۇش اەس سالۋ تۋرالى شەشىم قابىلدادىق. وسى ماڭىزدى جوباعا ءىرى كومپانيالاردى تارتۋعا قاتىستى جۇمىس جۇرگىزىلىپ جاتىر. قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى قۇرىلدى. اەس قۇرىلىسى بويىنشا قىتايدىڭ CNNC كومپانياسىن سەنىمدى ستراتەگيالىق سەرىكتەس رەتىندە قاراستىرىپ وتىرعانىمىزدى ەرەكشە اتاپ وتكىم كەلەدى. الەمگە ايگىلى كومپانيا ءبىزدىڭ نارىقتا ءوز ورنىن تاباتىنى انىق. سونىمەن قاتار قازاقستان قىتايعا تابيعي ۋران مەن يادرولىق وتىن جەتكىزىپ وتىرعان سەنىمدى ەل”، – دەدى پرەزيدەنت.
سي تسزينپين قازاق جەرىندە كورسەتىلگەن سىي-قۇرمەت ءۇشىن توقاەۆقا ريزاشىلىعىن ءبىلدىردى. ول قازاقستان ۇلتتىق جاڭعىرۋ جولىنا تۇسكەنىن، ەل دامۋىندا تىڭ تابىستارعا قول جەتكىزىپ كەلە جاتقانىن اتاپ ءوتتى.
“تاتۋ كورشى ءارى ستراتەگيالىق سەرىكتەس رەتىندە ءبىز سىزدەردىڭ جەتىستىكتەرىڭىزگە ءتانتىمىز. قىتاي مەن قازاقستاننىڭ قارىم-قاتىناسى قۇبىلمالى الەمنىڭ سىنىنا توتەپ بەرىپ، قارقىندى دامىپ كەلەدى. بۇل – تەك گەوگرافيالىق تۇرعىدان جاقىندىقتىڭ، عاسىرلارعا ۇلاسقان دوستىقتىڭ ارقاسى عانا ەمەس، ەلدەرىمىزدىڭ وركەندەۋ جولىنداعى تابيعي سۇرانىسى. سوڭعى جىلدارى بىرلەسكەن كۇش-جىگەردىڭ ناتيجەسىندە تاعدىرى ورتاق قىتاي مەن قازاقستان اراسىنداعى ىقپالداستىق جاڭا ءمان-مازمۇنمەن تولىعىپ جاتىر. بىرقاتار الەۋمەتتىك ماڭىزى بار جوبالاردىڭ جۇزەگە اسىرىلۋى قوس حالىققا ايتارلىقتاي پايدا اكەلدى”، – دەدى قحر توراعاسى.
پرەزيدەنت قاسىم-جومارت توقاەۆ پەن قحر توراعاسى سي تسزينپين جۇرگىزگەن كەلىسسوز ناتيجەسىندە 24 ۇكىمەتارالىق جانە ۆەدومستۆوارالىق قۇجاتقا قول قويىلدى
ەكى ەل دەلەگاتسياسىنىڭ مۇشەلەرى ەنەرگەتيكا، اەروعارىش، تسيفرلاندىرۋ، كەدەن، اۋىل شارۋاشىلىعى، ەلەكتروندى ساۋدا، تۋريزم، زياتكەرلىك مەنشىك، مەديتسينا، مەديا، عىلىم، وڭىرارالىق بايلانىس سالالارىنداعى ىنتىماقتاستىقتى قامتيتىن قۇجاتتارمەن الماستى.
ولاردىڭ ىشىندە ينۆەستيتسيالاردى كوتەرمەلەۋ جانە ءوزارا قورعاۋ، تەحنيكالىق-ەكونوميكالىق ىنتىماقتاستىق تۋرالى ۇكىمەتارالىق كەلىسىمدەر بار.
