بۇگىن قر پارلامەنتى ماجىلىسىندە “قازاقستانداعى ءدىني احۋال. راديكاليزم مەن ەكسترەميزمگە قارسى كۇرەس” تاقىرىبىندا كەڭەيتىلگەن وتىرىس ءوتتى. كەڭەستە راديكالدى توپتارلىڭ ۇلكەندەردىڭ ساناسىن عانا ەمەس، مەكتەپ پەن بالاباقشاعا باراتىنداردىڭ ساناسىن دا مىقتاپ ۋلاۋعا كىرىسكەنى ايتىلىپ، ءدىن ىستەرى باسقارمالارىنىڭ ماسەلەلەرى تالقىعا ءتۇستى، دەپ حابارلايدى "ادىرنا" ۇلتتىق پورتالى.
قر ءماجىلىسىنىڭ دەپۋتاتى نارتاي سارسەنعاليەۆتىڭ ايتۋىنشا, ەلىمىزدە بولعان لاڭكەستىك شابۋىلدار مەن تەررورلىق ارەكەتتەر ءجىتى تەكسەرىلمەيدى. مەملەكەت ۇنەمى وقيعانىڭ سالدارىمەن كۇرەسۋمەن كەلەدى.
- بۇعان دەيىن قازاقستاننىڭ قاي ايماعىندا لاڭكەستىك شابۋىل بولسا نەمەسە تەررورلىق اكت جاساماق بولعاندار ۇستالسا عانا قوعام بولىپ تالقىلاپ، كەيىن كومەسكى قالاتىن تاقىرىپ ەدى بۇل. بۇل ءوز كەزەگىندە ماسەلەنىڭ تەك سالدارىمەن كۇرەسۋگە اكەلەدى. ال سەبەبى قاشانعىداي ەسكەرۋسىز قالادى.
بايانداما وقىدىم، وعان دايىندالعاندا ەلدەگى ءدىني احۋالدىڭ قانشالىقتى قاۋىپتى بوپ كەتكەنىنە كوزىم جەتتى. تاقىرىپقا قاتىستى ايتىلعان دەرەكتەردىڭ كوبى قۇپيا، سوندىقتان جاريالاۋعا بولمايدى. الايدا، جۇمىس توبىن قۇرساق بۇل ماسەلەگە قاتىستى زاڭ جوباسىن قايتادان ءجىتى قاراۋعا، جۇمىستى جۇيەلى جۇرگىزۋگە مۇمكىندىك الامىز، - دەدى دەپۋتات.
سونىمەن قاتار، نارتاي سارسەنعاليەۆ وڭىردەگى ءدىني احۋالمەن ءدىن ىستەرى باسقارمالارى قاجەتتى دارەجەدە اينالىسىپ وتىرا الماعانىن ايتى. ءدىن اتىن جامىلعان جات اعىمنىڭ مەكتەپ پەن بالاباقشالاردا تامىر جايا باستاعانىنان قاۋىپتەندى.
- ءبىر دەرەك، وڭىردەگى ءدىني احۋالدى ءدىن ىستەرى باسقارمالارىنا سەنىپ تاپسىرادى بيلىك. سوراقىسى سول، 4 وبلىستا ءدىن ىستەرى باسقارماسى اتىمەن جوق. سوندا ول جاقتاعى راديكالدى اعىم وكىلدەرىمەن كىم كۇرەسىپ، ولاردى وڭالتۋ جۇمىستارىمەن كىم اينالىسىپ جاتىر؟ ول ول ما، ءدىن ىستەرى باسقارماسى بار وڭىرلەردە دە جاعداي وڭىپ تۇرعان جوق. سەبەبى ول جەردەگى تەولوگ، ءدىنتانۋشى، پسيحولوگ، يسلامتانۋشى مامانداردىڭ جالاقىسى وتە تومەن. تيىسىنشە كادر تۇراقتامايدى. بۇل بۇگىن قىزۋ تالقىلانعان ماسەلەلەردىڭ ءبىر پاراسى عانا.
راديكالدار ۇلكەندەر مەن ورتا جاستاعى ازاماتتارىمىزدى عانا ەمەس، بالاباقشا مەن مەكتەپتەگى بالالارىمىزدىڭ دا ميىن ۋلاۋعا مىقتاپ كىرىسكەن. سۇمدىق! الداعى ۋاقىتتا بۇل تاقىرىپپەن تىڭعىلىقتى اينالىساتىن بولامىز. ەلىمىز امان بولسىن! - دەدى دەپۋتات.
