مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ جيىنعا قاتىسۋشىلاردى وتان قورعاۋشى جانە جەڭىس كۇنىمەن قۇتتىقتاپ، جىل سايىن قاتار اتاپ وتىلەتىن قوس مەرەكە وتان ءۇشىن وت كەشكەن اعا بۋىن مەن ەگەمەن ەلدىڭ ساربازدارى اراسىنداعى ساباقتاستىقتى بىلدىرەتىنىنە نازار اۋداردى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
– قازاق – داڭقتى تاريحىن ات تۇياعىمەن جازعان حالىق. ءبىز ۇلان-عايىر جەرىن جاۋعا باستىرماعان باتىر ەلدىڭ ۇرپاعىمىز. الاپات سوعىستا جەڭىسكە جەتكەن قاھارمان ەرلەردىڭ ءىزباسارىمىز. قازىر ەلىمىزدىڭ كۇشتىك قۇرىلىمدارى قازاقستاننىڭ قاۋىپسىزدىگىن قاس قاقپاي كۇزەتىپ تۇر. وتانىمىزدىڭ ىرگەسى بەرىك بولۋىن قامتاماسىز ەتۋ – ءار ازاماتتىڭ پەرزەنتتىك پارىزى. سونداي-اق ءومىر جولىن اسكەري قىزمەتكە ارناعان مامانداردىڭ كاسىبي مىندەتى. قازاقستان – بەيبىت مەملەكەت. ءبىز بارلىق ەلدەرمەن دوستىق قاتىناس ورناتتىق. مەملەكەتتەر اراسىنداعى كەز كەلگەن ماسەلەنى بەيبىت جولمەن شەشۋ كەرەك دەپ سانايمىز. دەگەنمەن قامسىز وتىرۋعا بولمايدى. بارلىق جاعدايعا ساقاداي ساي بولۋىمىز ايرىقشا ماڭىزدى. ەلىمىزدىڭ قورعانىس جانە قاۋىپسىزدىك سالاسىن كۇشەيتۋ – باستى مىندەتتىڭ ءبىرى، – دەدى مەملەكەت باسشىسى.پرەزيدەنت مەملەكەتتىڭ قورعانىس قابىلەتىن كۇشەيتۋ، ۇلتتىق قاۋىپسىزدىكتى نىعايتۋ، سونداي-اق زاڭ ۇستەمدىگى مەن قۇقىقتىق ءتارتىپتى قامتاماسىز ەتۋ ەلىمىزدىڭ مىزعىماس باسىمدىقتارى ەكەنىن اتاپ ءوتتى.
– مەملەكەت كۇشتىك قۇرىلىمدارعا كورسەتىلەتىن قولداۋدى دايەكتى تۇردە كەڭەيتىپ كەلەدى. ينفراقۇرىلىم، ماتەريالدىق-تەحنيكالىق تۇرعىدا جابدىقتاۋ ماسەلەلەرى كەزەڭ-كەزەڭمەن جاقسارىپ، ەڭبەكاقى مەن الەۋمەتتىك جەڭىلدىكتەر ارتىپ كەلەدى. اسكەري قىزمەتشىلەر، ارناۋلى جانە قۇقىق قورعاۋ ورگاندارىنىڭ قىزمەتكەرلەرى، كۇشتىك قۇرىلىمداردىڭ ارداگەرلەرى ءاردايىم مەملەكەتتىڭ كومەگى مەن قامقورلىعىنا سەنۋىنە بولادى. وتان قورعاۋ – ءاربىر ازامات ءۇشىن بيىك مارتەبە. سونداي-اق بۇل – تۋعان ەلدىڭ، بولاشاق ۇرپاقتىڭ الدىنداعى ۇلكەن جاۋاپكەرشىلىك. سىزدەر ەلىمىزدەگى بەيبىت ءومىردى، تىنىشتىق پەن تۇراقتىلىقتى ساقتاۋعا زور ۇلەس قوسىپ جۇرسىزدەر. ءوز ءىسىنىڭ ناعىز شەبەرى اتانىپ، ءمىنسىز قىزمەت اتقارىپ كەلەسىزدەر. ورتامىزدا انتىنا ادال بولىپ، ەل قاۋىپسىزدىگى ءۇشىن باسىن قاتەرگە تىككەن بەيبىت كۇننىڭ باتىرلارى بار. ولاردىڭ ەرلىگى، شىن مانىندە، بارشا حالىققا، اسىرەسە، جاستارعا ۇلگى-ونەگە، – دەدى قاسىم-جومارت توقاەۆ.پرەزيدەنت ءسوزىن قورىتىندىلاي كەلە، ەل تىنىشتىعىن، مەملەكەت قاۋىپسىزدىگىن قورعاۋعا اتسالىسىپ جۇرگەن بارشا ازاماتقا العىس ايتتى.
