Memleket basşysy – Qazaqstan Qaruly Küşterınıŋ Joǧarǧy Bas qolbasşysy Qasym-Jomart Toqaev jiynǧa qatysuşylardy Otan qorǧauşy jäne Jeŋıs künımen qūttyqtap, jyl saiyn qatar atap ötıletın qos mereke Otan üşın ot keşken aǧa buyn men egemen eldıŋ sarbazdary arasyndaǧy sabaqtastyqty bıldıretınıne nazar audardy, dep habarlaidy «Adyrna» tılşısı Aqordaǧa sılteme jasap.
– Qazaq – daŋqty tarihyn at tūiaǧymen jazǧan halyq. Bız ūlan-ǧaiyr jerın jauǧa bastyrmaǧan batyr eldıŋ ūrpaǧymyz. Alapat soǧysta jeŋıske jetken qaharman erlerdıŋ ızbasarymyz. Qazır elımızdıŋ küştık qūrylymdary Qazaqstannyŋ qauıpsızdıgın qas qaqpai küzetıp tūr. Otanymyzdyŋ ırgesı berık boluyn qamtamasyz etu – är azamattyŋ perzenttık paryzy. Sondai-aq ömır jolyn äskeri qyzmetke arnaǧan mamandardyŋ käsıbi mındetı. Qazaqstan – beibıt memleket. Bız barlyq eldermen dostyq qatynas ornattyq. Memleketter arasyndaǧy kez kelgen mäselenı beibıt jolmen şeşu kerek dep sanaimyz. Degenmen qamsyz otyruǧa bolmaidy. Barlyq jaǧdaiǧa saqadai sai boluymyz airyqşa maŋyzdy. Elımızdıŋ qorǧanys jäne qauıpsızdık salasyn küşeitu – basty mındettıŋ bırı, – dedı Memleket basşysy.Prezident memlekettıŋ qorǧanys qabıletın küşeitu, ūlttyq qauıpsızdıktı nyǧaitu, sondai-aq zaŋ üstemdıgı men qūqyqtyq tärtıptı qamtamasyz etu elımızdıŋ myzǧymas basymdyqtary ekenın atap öttı.
– Memleket küştık qūrylymdarǧa körsetıletın qoldaudy däiektı türde keŋeitıp keledı. İnfraqūrylym, materialdyq-tehnikalyq tūrǧyda jabdyqtau mäselelerı kezeŋ-kezeŋmen jaqsaryp, eŋbekaqy men äleumettık jeŋıldıkter artyp keledı. Äskeri qyzmetşıler, arnauly jäne qūqyq qorǧau organdarynyŋ qyzmetkerlerı, küştık qūrylymdardyŋ ardagerlerı ärdaiym memlekettıŋ kömegı men qamqorlyǧyna senuıne bolady. Otan qorǧau – ärbır azamat üşın biık märtebe. Sondai-aq būl – tuǧan eldıŋ, bolaşaq ūrpaqtyŋ aldyndaǧy ülken jauapkerşılık. Sızder elımızdegı beibıt ömırdı, tynyştyq pen tūraqtylyqty saqtauǧa zor üles qosyp jürsızder. Öz ısınıŋ naǧyz şeberı atanyp, mınsız qyzmet atqaryp kelesızder. Ortamyzda antyna adal bolyp, el qauıpsızdıgı üşın basyn qaterge tıkken beibıt künnıŋ batyrlary bar. Olardyŋ erlıgı, şyn mänınde, barşa halyqqa, äsırese, jastarǧa ülgı-önege, – dedı Qasym-Jomart Toqaev.Prezident sözın qorytyndylai kele, el tynyştyǧyn, memleket qauıpsızdıgın qorǧauǧa atsalysyp jürgen barşa azamatqa alǧys aitty.
