ءماجىلىس دەپۋتاتى اناس باققوجاەۆ ۇكىمەت باسشىسى ءاليحان سمايىلوۆتىڭ جانە باس پروكۋرور بەرىك اسىلوۆتىڭ اتىنا دەپۋتاتتىق ساۋال جولداپ، وندا بلوگەرلەر تۋرالى ايتقان. دەپۋتات بلوگەرلەر تۋرالى ايتا كەلىپ: «بىراق، الەۋمەتتىك جەلىلەرىن پايدالانىپ، ازاماتتار مەن ۇيىمداردىڭ قۇقىعى مەن زاڭدى مۇددەلەرىنە زيان كەلتىرەتىن جالعان اقپارات تاراتقانى ءۇشىن ولارعا قولدانىلاتىن شارا قاراستىرىلماعان. سول سەبەپتى ولاردا ەشقانداي جاۋاپكەرشىلىك جوق. ارتىن زەرتتەپ، شىندىق پا، جوق پا باستارىن قاتىرمايدى. باستىسى شۋ. باستىسى ءسوز» دەيدى. دەپۋتاتتىق ساۋالدىڭ تولىق نۇسقاسىن تومەندە بەرىپ وتىرمىز.
«وسىدان ون شاقتى جىل بۇرىن «بلوگەر» دەگەن ءسوز قازاق قوعامىنا العاش ەنگەندە – ءبىز ولاردى ساپالى كونتەنت جاسايتىن جاس ماماندار دەپ قابىلداعان ەدىك. العاشىندا بالكىم سولاي بولعان دا شىعار، بىراق قازىر «بلوگەر» دەگەن كىم؟
قازىر ءوزىن بلوگەرمىن دەپ جۇرگەندەردىڭ دەنى – اقپاراتتىڭ راس-وتىرىگىن تەكسەرمەي، وڭاي جولمەن بايۋ ماقساتىندا كەز كەلگەن ادامعا جالا جابۋدان تايىنبايتىن، بوپسالاپ اقشا تاباتىن، اتاققۇمار، ەلدىڭ بەرەكەسىن بۇزىپ، قاۋىپسىزدىگىنە قاتەر توندىرەتىن ساۋاتسىز ادامدار.
ءوزىن بلوگەر ساناپ جۇرگەندەردىڭ باسىم بولىگى شىن مانىندە بلوگتىڭ نە ەكەنىن ءتۇسىنىپ ءجۇر دەپ ايتا المايمىز. كوپشىلىگى ەل الدىنداعى بەدەلىن، اتاق-دارەجەسىن پايدالانىپ، حالىققا كومەك جاساپ جاتقانداي سىڭاي تانىتىپ، الەۋمەتتىك جەلىلەردە ءتۇرلى «حايپ» ۇيىمداستىرىپ الەك.
ءدال وسى بلوگەرلەر تالاي جىلدان بەرى ۇمىت بولعان قارجىلىق پيراميدانىڭ جاندانۋىنا دا سەبەپ بولعانىن ءبارىمىز جاقسى بىلەمىز. سول الاياقتارعا سەنىپ قالعان قانشاما ادام سۋيتسيد جاسادى، قانشاۋى دەنساۋلىعىنان ايرىلدى، تاعى قانشاماسى ءۇيسىز-كۇيسىز قالىپ، قاڭعىرىپ كەتتى؟! ولاردىڭ وبالى كىمگە؟
ەلدە بولىپ جاتقان ءتۇرلى الەۋمەتتىك جاعدايلاردى ءوز ىڭعايىنا بۇرمالاپ، وعان ۇلتارالىق رەڭ بەرىپ، ەلگە جالعان اقپارات تاراتقان بلوگەرلەردىڭ دە ءىسى مايشاممەن قارالۋى كەرەك ەدى. راستالماعان قاۋەسەتتىڭ الەۋمەتتىك جەلى ارقىلى تەز تاراۋىنان قورداي وقيعاسىنىڭ نەمەن اياقتالعانى بارىڭىزگە ءمالىم.
جەكە ازاماتتاردىڭ ىشكەن-جەگەنىن، كيگەن كيىمىنە دەيىن اڭدىپ، قوعامدا كيبەربۋللينگ جاساپ جۇرگەن بلوگەرلەر توبى تاعى بار.
وكىنىشكە قاراي، ومىرگە دەگەن كوزقاراسى ەندى قالىپتاسىپ كەلە جاتقان جاستارىمىز وسى بلوگەرلەرگە ەلىكتەپ، جاتىپىشەرلىككە اۋەستەنىپ بارادى، ولار ۇلتىمىزعا جات مادەنيەت پەن تەرىس يدەولوگيانى بويىنا ءسىڭىرىپ جاتىر. سونداي-اق، وسى بلوگەرلەردىڭ سوزىنە سەنىپ، شەتەلگە كۇڭدىككە تۇسكەن قىزدارىمىز قانشاما؟!
ءبىز قىسقا عانا ۋاقىت ىشىندە ءسوزى مەن ىسىنە جاۋاپ بەرە المايتىن بلوگەرلەردىڭ وتانىنا اينالىپ كەتكەندەيمىز. بۇل – قوعام ءۇشىن دە، مەملەكەت ءۇشىن دە قاۋىپتى قۇبىلىس.
ال، مۇنىڭ ءبارى بىزدەگى زاڭنامادا بلوگەر مارتەبەسى ايقىندالماعاننان. جاۋاپكەرشىلىكتىڭ جوق ەكەنىن سەزىنگەن مۇنداي ادامدار ارينە، ويىنا كەلگەنىن ىستەيدى.
كوپكە توپىراق شاشۋدان اۋلاقپىن. حالىققا شىن جاناشىر بلوگەرلەر دە ءبىزدىڭ ەلدە جوق ەمەس. كوپبالالى جالعىزباستى انالارعا، مۇگەدەك جاندارعا جاردەم بەرىپ، الەۋمەتتىك جەلى ارقىلى حالىققا پايداسىن تيگىزىپ جۇرگەن جەرلەستەرىمە تەك باس يەمىن. وقىرمانعا قىزىقتى ءارى پايدالى اقپارات تاراتىپ، جەكە بلوگىن جۇرگىزىپ جۇرگەندەرگە دە ايتار داۋىمىز جوق.
بىراق، الەۋمەتتىك جەلىلەرىن پايدالانىپ، ازاماتتار مەن ۇيىمداردىڭ قۇقىعى مەن زاڭدى مۇددەلەرىنە زيان كەلتىرەتىن جالعان اقپارات تاراتقانى ءۇشىن ولارعا قولدانىلاتىن شارا قاراستىرىلماعان. سول سەبەپتى ولاردا ەشقانداي جاۋاپكەرشىلىك جوق. ارتىن زەرتتەپ، شىندىق پا، جوق پا باستارىن قاتىرمايدى. باستىسى شۋ. باستىسى ءسوز.
كىمنىڭ بولماسىن الدىندا تىكەڭدەپ، بەتتەن الىپ، جەكە باسىنا تيىسەدى. ءسوز بوستاندىعى دەگەن وسى ما؟ ءبىز وسىلايشا تۇتاستاي ءبىر ماماندىقتى قور قىلىپ وتىرمىز. جۋرناليستەردىڭ كوبى جۇمىسسىز! ولاردىڭ ءبىلىمى دە، تالابى دا بار. ولاردىڭ بلوگەرلەردەن ايىرماشىلىعى – ادەپتى، سوندىقتان دا جۇمىسسىز»، – دەلىنگەن دەپۋتاتتىق ساۋالدا.
