تالدىقورعاندا الماتى وبلىسى پوليتسيا دەپارتامەنتىنىڭ بۇرىنعى باسشىسى، گەنەرال-مايور سەرىك كۇدەباەۆتىڭ ىسىنە قاتىستى سوت قايتا جالعاسپاق، دەپ حابارلايدى «ادىرنا» ءتىلشىسى.
وعان قىلمىستىق كودەكستىڭ 370-بابى 4-بولىگىنىڭ 1-تارماعى «اۋىر زارداپتارعا اكەپ سوققان قىزمەتتەگى ارەكەتسىزدىك» بويىنشا ايىپ تاعىلىپ وتىر. بۇعان دەيىن پروكۋرور سۋديادان سەرىك كۇدەباەۆقا 9 جىل باس بوستاندىعىنان ايىرۋ جازاسىن تاعايىنداۋدى سۇراعان ەدى.
سوت وتىرىسىنا كەلگەن كۇدەباەۆتىڭ ۇلى اكەسىنىڭ قازاقستانعا ءوز ەركىمەن ورالعانىن ايتتى.
«كەيبىر باق جالعان اقپارات تاراتىپ جاتىر. اكەم ەلگە ءوز ەركىمەن كەلدى. مەنىڭ ۇلىما حابارلاسىپ، بارلىعىن جاقسى كورەتىنىن جانە وتانىنا كەلە جاتقانىن ايتقان. ءبىز ەشقايدا كەتكەن جوقپىز، وتباسىمىز تۇراقتى باقىلاۋدا بولدى»،—دەدى ارمان مىرزاقۇلوۆ Orda.kz-كە بەرگەن سۇقباتىندا.ەسكە سالساق، ايىپتالۋشى 3 ساۋىردە سوتقا كەلمەي، وعان حالىقارالىق ىزدەۋ جاريالاندى. كەيىن كۇدەباەۆتىڭ قازاق-قىرعىز شەكاراسىن كەسىپ ءوتىپ، 23 ناۋرىز كۇنى بىشكەكتەن ستامبۋلعا ۇشىپ كەتكەنى بەلگىلى بولدى. 12 ساۋىردە باس پروكۋراتۋرا گەنەرال-مايورعا قاتىستى مەملەكەتتىك شەكارانى زاڭسىز كەسىپ ءوتۋ فاكتىسى بويىنشا قىلمىستىق ءىس قوزعادى. 27 ساۋىردە باس پروكۋرور بەرىك اسىلوۆ كۇدىكتىنىڭ ۇستالعانىن حابارلادى. سەرىك كۇدەباەۆ الماتى پوليتسيا دەپارتامەنتىن 7 جىل باسقارعان. 2020 جىلى الماتى وبلىسى پوليتسياسىنىڭ باسشىسى بولىپ تاعايىندالدى. قاڭتارداعى تارتىپسىزدىكتەردەن كەيىن ول قىزمەتىنەن بوساتىلدى.
