استانادا ەر ادام اناسىنا قاتىستى بالاعات سوزدەر ايتىپ، ونىڭ ار-نامىسىن قورلاعانى ءۇشىن قاماۋعا الىندى. بۇل تۋرالى قالالىق پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
«ەلوردانىڭ 81 جاستاعى تۇرعىنى 55 جاستاعى ۇلىنىڭ ۇستىنەن شاعىم ءتۇسىردى. ايتۋىنشا، بالاسى ۇيدە جانجال شىعارىپ، ونى قورلاعان جانە كەمسىتكەن. بالاعات سوزدەر ايتۋ ارقىلى پسيحولوگيالىق زورلىق-زومبىلىق كورسەتە باستاعانى انىقتالدى»،—دەدى باسقارما.
بۇل دەرەك بويىنشا سارىارقا اۋدانى پب ۋچاسكەلىك ينسپەكتورى قۇقىق بۇزعان ەر ادامعا قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 73-بابى 2-بولىگى بويىنشا اكىمشىلىك حاتتاما تولتىردى.
اكىمشىلىك قۇقىقبۇزۋشىلىق جونىندەگى مامانداندىرىلعان اۋدانارالىق سوتتىڭ شەشىمىمەن ەر ادام 7 تاۋلىك مەرزىمگە اكىمشىلىك قاماۋعا الىندى.
ايتا كەتەيىك، ناۋرىز ايىنان باستاپ، اكىمشىلىك قۇقىق بۇزۋشىلىق تۋرالى كودەكسكە بالاعات سوزدەر ايتقانى ءۇشىن جازانى قاتايتاتىن تۇزەتۋلەر كۇشىنە ەنگەن بولاتىن.
مۇنداي ارەكەت ءۇشىن 20 اەك (69 مىڭ تەڭگە تۇرىندەگى جازا) ايىپپۇل نەمەسە 5-تەن 15 تاۋلىككە دەيىن قاماۋعا الادى.
