بۇگىن استانادا ەر ادام كرانعا شىعىپ، ءوزىن ورتەپ جىبەرەمىن دەپ قورقىتتى، دەپ حابارلايدى "ادىرنا" ۇلتتىق پورتالى.
ول سولتۇستىك قازاقستان وبلىسىندا ورنالاسقان شارۋاشىلىقتاعى 220 گەكتار جەر تەلىمىنە قاتىستى جەر داۋى بويىنشا سوت شەشىمىنە نارازى كورىنەدى. نەگىزى بۇل جەر ونىڭ وتباسىنا تيەسىلى ەكەنى ايتىلعان. ال 2002 جىلى 2051 جىلعا دەيىن جەكە كاسىپكەرگە جالعا بەرىلگەن. ول وتباسىنا تابىستىڭ 10 پايىزىن بەرۋى كەرەك ەدى، الايدا كرانعا شىعىپ العان ادامنىڭ تۋىسىنىڭ ايتۋىنشا، جالعا الۋشى العاشقى كۇننەن باستاپ ءوز مىندەتتەرىن اتقارۋدان جالتارعان.
بۇل وتباسى اكىمدىكتىڭ وزدەرىن جەر تەلىمىنە قاتىستى قۇقىعىنان ايىرىپ، ونى 30 جىل مەرزىمگە سول جەكە كاسىپكەردىڭ پايدالانۋىنا بەرگەنىن 2021 جىلدىڭ جەلتوقسانىندا ءبىر-اق بىلگەن.
بۇل جولى ەر ادام استاناعا «اكىمدىكتىڭ جەكە كاسىپكەرگە جەردى 30 جىل مەرزىمگە جالعا بەرۋ تۋرالى شەشىمىن زاڭسىز دەپ تانۋ، سونىمەن قاتار كەلتىرىلگەن شىعىندى وتەۋ» تالابىمەن كەلگەن. ول شارتىن بۇگىن ساعات 18:00-گە دەيىن ورىنداۋدى تالاپ ەتىپ وتىر. ايتپەسە، ءوزىن-ءوزى ورتەپ جىبەرمەك.
