قوستاناي وبلىسىنىڭ سارىكول اۋدانىنا قاراستى بارۆينوۆ اۋىلىندا باپكەر نۇرلان تايجانوۆ شاكىرتتەرىن ازيا چەمپيوناتىنا اپارۋ ءۇشىن قايىر سۇراپ ءجۇر. بۇل تۋرالى Bassport.kz جاريالادى، دەپ حابارلايدى “ادىرنا” ۇلتتىق پورتالى.
باسىلىمنىڭ مالىمەتىنشە، ول گىر تاسىن كوتەرۋدەن شاكىرت تاربيەلەپ، 13 جىلدان بەرى اۋىل سپورتىن كوتەرۋگە تىرىسىپ ءجۇر. سوڭعى 6 جىلىن بالالار مەن جاسوسپىرىمدەردىڭ سپورت مەكتەبىنە ارناعان. بۇگىندە نۇرلاننىڭ قاراماعىندا 30 وقۋشى جاتتىعادى.
ازيا چەمپيوناتى مامىردىڭ العاشقى اپتاسىندا وتەدى. باپكەر بالالاردىڭ جول شىعىنىنا اقشا تاپپاي، قينالىپ ءجۇر. سەبەبى بالالارىن جارىسقا جىبەرەتىن جول قاراجاتىن اتا-انالاردىڭ قالتاسى كوتەرمەيدى.
باپكەردىڭ ايتۋىنشا، ءبىر بالانىڭ بارىپ-قايتۋىنا كەمىندە 250 مىڭ تەڭگە قاجەت. ەندى ول بالالاردى جارىستان قالدىرماۋ ءۇشىن نەسيە الۋدى دا ويلاپ ءجۇر.
“استاناداعى قازاقستان بىرىنشىلىگىندە 2 التىن، 2 كۇمىس، 1 قولا مەدال جەڭىپ الدىق. ناۋرىزدىڭ سوڭىندا تاعى 3 التىن، 1 كۇمىس مەدالعا يە بولدىق. وقۋشىلارىم اۋدان، وبلىس قۇرامالارىنا ۇنەمى ىلىگىپ ءجۇر. سونىمەن قاتار قازاقستاننىڭ جاسوسپىرىمدەر قۇراماسىنا دا شاقىرتۋ الادى. ەندى ازيا چەمپيوناتىنا بارۋ ءۇشىن جول قاراجاتى قاجەت”، – دەيدى نۇرلان تايجانوۆ.
ايتۋىنشا، ول جىل سايىن شاكىرتتەرىن جارىسقا اپارۋ ءۇشىن اقشا ىزدەي بەرۋدەن شارشاعان. بۇعان دەيىن اۋىل حالقى، مەتسەناتتار كومەكتەسىپ كەلىپتى. ەگەر وسىلاي جالعاسا بەرسە، بالالاردى جاتتىقتىرۋعا دەگەن ىنتا-جىگەر كەتىپ قالاتىنىن ايتادى. بارلىق رەسۋرسىن جۇمساپ بولعان نۇرلان تايجانوۆ وسى جولى كرەاتيۆتى ۆيدەو ءتۇسىرۋدى قولعا العان.
