Qostanaı oblysynyń Sarykól aýdanyna qarasty Barvınov aýylynda bapker Nurlan Taıjanov shákirtterin Azııa chempıonatyna aparý úshin qaıyr surap júr. Bul týraly Bassport.kz jarııalady, dep habarlaıdy “Adyrna” ulttyq portaly.
Basylymnyń málimetinshe, ol gir tasyn kóterýden shákirt tárbıelep, 13 jyldan beri aýyl sportyn kóterýge tyrysyp júr. Sońǵy 6 jylyn balalar men jasóspirimderdiń sport mektebine arnaǵan. Búginde Nurlannyń qaramaǵynda 30 oqýshy jattyǵady.
Azııa chempıonaty mamyrdyń alǵashqy aptasynda ótedi. Bapker balalardyń jol shyǵynyna aqsha tappaı, qınalyp júr. Sebebi balalaryn jarysqa jiberetin jol qarajatyn ata-analardyń qaltasy kótermeıdi.
Bapkerdiń aıtýynsha, bir balanyń baryp-qaıtýyna keminde 250 myń teńge qajet. Endi ol balalardy jarystan qaldyrmaý úshin nesıe alýdy da oılap júr.
“Astanadaǵy Qazaqstan birinshiliginde 2 altyn, 2 kúmis, 1 qola medal jeńip aldyq. Naýryzdyń sońynda taǵy 3 altyn, 1 kúmis medalǵa ıe boldyq. Oqýshylarym aýdan, oblys quramalaryna únemi iligip júr. Sonymen qatar Qazaqstannyń jasóspirimder quramasyna da shaqyrtý alady. Endi Azııa chempıonatyna barý úshin jol qarajaty qajet”, – deıdi Nurlan Taıjanov.
Aıtýynsha, ol jyl saıyn shákirtterin jarysqa aparý úshin aqsha izdeı berýden sharshaǵan. Buǵan deıin aýyl halqy, meenattar kómektesip kelipti. Eger osylaı jalǵasa berse, balalardy jattyqtyrýǵa degen ynta-jiger ketip qalatynyn aıtady. Barlyq resýrsyn jumsap bolǵan Nurlan Taıjanov osy joly kreatıvti vıdeo túsirýdi qolǵa alǵan.
