قوستانايدا 16 جاسار ءجاcوسپىرىم اۋىر جاراقاتتارمەن اۋرۋحاناعا ءتۇستى. ونى زىلدەي فۋتبول قاقپاسى باسىپ قالعان. ءدال وسىنداي جاعداي قوستانايدا 2 اپتا بۇرىن دا بولعان ەدى، دەپ حابارلايدى "ادىرنا" ۇلتتىق پورتالى.
alau.kz-ءتىڭ جازۋىنشا، دارىگەرلەر ۇستىنە فۋتبول قاقپاسى قۇلاعان ناۋقاسقا قاتىستى بىلاي دەيدى:
«ناۋقاستىڭ 12 ەلى ىشەگى ۇزىلگەن. بۇل – سيپاتى جاعىنان دا، ەمدەلۋى جاىنان دا ەڭ اۋىر جاراقاتتاردىڭ ءبىرى. اسقىنۋلار بولۋى مۇمكىن. بالا قازىر جانساقتاۋ بولىمىندە جاتىر، ول وكپەنى جاساندى جەلدەتۋ اپپاراتىنا قوسىلعان. وتا جاسالدى. جاعدايى اۋىر، بىراق تۇراقتاندى. ءوز بەتىمەن دەمالۋى ءۇشىن اپپاراتتى اجىراتۋ بويىنشا شەشىم قابىلدايمىز»، - دەدى وبلىستىق بالالار اۋرۋحاناسى حيرۋرگيالىق قىزمەت سەكتورىنىڭ مەڭگەرۋشىسى يگور بەلوبرجيتسكي.
ءجاسوسپىرىمدى جازىم قىلعان وقيعا 12 ءساۋىر كۇنى بولعان. ءدال مۇنداي دەرەكپەن بۇدان 2 اپتا بۇرىن ۇزىنكول اۋدانىنان 16 جاسار بالا تۇسكەن. ءتورت جىل بۇرىن "قاقپا كەسىرىنەن" ءبىر بالا اجال قۇشقان. دارىگەرلەر مۇنداي وقيعامەن تىركەلگەن ۇزىنكولدىك جاس سپورتشىنىڭ جاعدايى مەن قوستانايداعى جازاتايىم وقيعاعا قاتىستى حابارلاما جاسادى:
«ءجاسوسپىرىمنىڭ باسىنا فۋتبول قاقپاسى قۇلاعان. باس سۇيەك-مي جاراقاتىمەن ءتۇستى. جاعدايى ورتاشا اۋىر بولدى. قازىر جازىلىپ كەلەدى. وسىدان 4 جىل بۇرىن قوستانايدا ۇستىنە فۋتبول قاقپاسى قۇلاعان بالا كوز جۇمعان ەدى. ەندى مۇنداي جاعدايلار قايتالانبايتىن شىعار دەپ ويلاعانبىز. وكىنىشكە قاراي، ماسەلە ءالى دە بار»، - دەدى دارىگەر.
"ادىرنا" ۇلتتىق پورتالى
