لاس-ۆەگاستا وتەتىن UFC 285 ءتۋرنيرىنىڭ الدىندا وكتاگونعا شىعاتىن قازاقستاندىق شاۆكات راحمونوۆ پەن ونىڭ قارسىلاسى امەريكالىق دجەفف ءنيلدىڭ سوڭعى سالماق ولشەۋ ءراسىمى ءوتتى. ولار سالماق ايىرماشىلىعىنا قاراماستان، جەكپە-جەككە شىعاتىن بولدى، دەپ حابارلايدى “ادىرنا” ۇلتتىق پورتالى.
ءمالىم بولعانداي، ش. راحمونوۆتىڭ قارسىلاسىنىڭ سالماعى شەكتى مەجەدەن اسىپ كەتتى. اتاپ ايتقاندا، تارازىعا تۇرعان وتانداسىمىزدىڭ سالماعى 77,56 كەلى، ال امەريكالىقتىڭ سالماعى 79,37 كەلى بولدى.
بۇل رەتتە UFC دجەفف ءنيلدىڭ سالماعى مەجەدەن اسىپ تۇسكەنىنە قاراماستان جەكپە-جەك وتەتىنىن رەسمي مالىمدەدى، سەبەبى شاۆكات راحمونوۆ باس تارتپاعان. الايدا، امەريكالىق سپورتشى گونارارىنىڭ 30 پايىزىن شاۆكات راحمونوۆقا بەرەدى.
ەسكە سالايىق، كەشە شاۆكات راحمونوۆ ءباسپاسوز كونفەرەنتسياسىن وتكىزىپ، نەگىزگى جەكپە-جەگى الدىندا قارسىلاسىمەن كوز ءتۇيىستىردى.
