ۇلتتىق قاۋىپسىزدىك كوميتەتى سيريادان قازاقستانعا بۇرىنعى قازاقستاندىق سودىردىڭ 7 جاسار قىزىن قايتاردى. بۇل تۋرالى اقپارات كوميتەتتىڭ رەسمي سايتىندا جاريالاندى، دەپ حابارلايدى “ادىرنا” ۇلتتىق پورتالى.
وندا مۇددەلى مەملەكەتتىك ورگاندارمەن، سونداي-اق شەتەلدىك سەرىكتەستەرىمەن بىرلەسىپ، ازاماتتاردى تەرروريستىك بەلسەندىلىك ايماقتارىنان قايتارۋ بويىنشا قارقىندى جۇمىستى جالعاسىپ جاتقانى جازىلعان.
ناتيجەسىندە سيريادان قازاقستانعا بۇرىنعى قازاقستاندىق سودىردىڭ 7 جاسار قىزى قايتارىلدى. ونى قايتارۋ بويىنشا گۋمانيتارلىق وپەراتسيا جارتى جىلدان استام ۋاقىت بويى جۇرگىزىلگەن.
“قازىرگى ۋاقىتتا بالا استانا قالاسىنىڭ بالالاردى قولداۋ ورتالىعىندا، پسيحولوگيالىق جاي-كۇيى قاناعاتتانارلىق. وسى ساتتە قىز بالا مەديتسينالىق تەكسەرۋدەن ءوتىپ جاتىر. ونى بەيىمدەۋ جانە وڭالتۋ جۇمىستارى جۇرگىزىلۋدە. جاقىن كەزەڭدە ول تۋىستارىنىڭ قاتارىنان قامقورشىلارعا بەرىلەتىن بولادى”، - دەلىنگەن اقپاراتتا.
ايتا كەتەيىك، كوميتەت سوڭعى 4 جىلدا تەرروريستىك بەلسەندى ايماقتاردان 518 كامەلەتكە تولماعان بالانى، ونىڭ ىشىندە 34 جەتىم بالانى قازاقستانعا قايتارعان.
