ءتىل ساياساتى كوميتەتى “قازاقستان رەسپۋبليكاسىندا ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداسىن بەكىتۋ تۋرالى” ۇكىمەت قاۋلىسىنىڭ جوباسىن دايىندادى، دەپ حابارلايدى “ادىرنا” ۇلتتىق پورتالى.
قۇجات مەملەكەتتىك ءتىلدى قوعامنىڭ بارلىق سالاسىندا قولدانۋ اياسىن كەڭەيتۋگە جانە ونىڭ مارتەبەسىن ارتتىرۋعا تىكەلەي ىقپال ەتەدى دەپ كورسەتىلگەن.
تۇجىرىمدامانىڭ ماقساتىنا قول جەتكىزۋ شەڭبەرىندە 13 نەگىزگى نىسانالى ينديكاتور جانە 5 كۇتىلەتىن ناتيجە ايقىندالعان.
2029 جىلعا قاراي كۇتىلەتىن نەگىزگى ناتيجەلەر:
- 84% – رەسپۋبليكا بويىنشا قازاق تىلىندە سويلەيتىن تۇرعىنداردىڭ ۇلەسى;
- 32% – ءۇش تىلدە سويلەيتىن تۇرعىنداردىڭ ۇلەسى;
- 15% – جاڭا ءالىپبي مەن ەملە ەرەجەسىن وقىتۋ كۋرسىمەن قامتىلعان تۇرعىندار ۇلەسى;
- 94% – ورتالىق مەملەكەتتىك جانە جەرگىلىكتى اتقارۋشى ورگانداردىڭ مەملەكەتتىك تىلدە ءىس جۇرگىزۋ ۇلەسى;
- 40% – قازاق ءتىلىنىڭ لاتىنگرافيكالى ءالىپبيىنىڭ ەملە ەرەجەسىنە نەگىزدەلگەن تەرمينولوگيالىق قوردىڭ ۇلەسى ء(وسۋ قورىتىندىسىمەن).
تۇجىرىمداما 6 بولىمنەن جانە ءىس-قيمىل جوسپارىنان تۇرادى.
قۇجاتتا قازاق ءالىپبيىن لاتىن گرافيكاسىنا كوشىرۋ جۇمىستارى قازاق ءالىپبيى مەن ەملە ەرەجەسى ءتيىستى نورماتيۆتىك قۇجاتتارمەن بەكىتىلگەننەن كەيىن كەزەڭ-كەزەڭىمەن ىسكە اسىرىلاتىنى جازىلعان.
“قازاق ءالىپبيىن لاتىن گرافيكاسىنا كوشىرۋ ماسەلەسىندە كەلەسى پروبلەمالار بار:
- قازاق ءالىپبيى مەن ەملە ەرەجەلەرى ءتيىستى نورماتيۆتىك قۇجاتتارمەن بەكىتىلمەدى;
- كەيبىر عالىمداردىڭ، قوعام مۇشەلەرىنىڭ ءالىپبي قۇرامىنداعى كەيبىر تاڭبالارعا بايلانىستى پىكىر الشاقتىعى بار;
- قوعامنىڭ تىلدىك اركەلكىلىگىنە بايلانىستى لاتىن ءالىپبيىن ەنگىزۋ ۇزاق مەرزىمگە سوزىلۋى مۇمكىن;
- لاتىن ءالىپبيىن ەنگىزۋ توڭىرەگىندە باق-تا ونى قابىلداۋدىڭ جاعىمسىز تۇستارى جونىندە سۋبەكتيۆتى پىكىرلەر كوپ”، - دەلىنگەن تۇجىرىمدامادا.
تۇجىرىمدامانى تالقىلاۋ 25 ساۋىرگە دەيىن جالعاسادى.
