دونالد ترامپ پرەزيدەنتتىك قىزمەتىنە كىرىسكەننەن كەيىن بىردەن بىرقاتار ماڭىزدى جارلىقتارعا قول قويدى، دەپ حابارلايدى "ادىرنا" ۇلتتىق پورتالى.
Reuters مالىمەتىنشە، ولاردىڭ ءبىرى اۆتوكولىك ونەركاسىبىن دامىتۋ ستراتەگياسىنا قاتىستى. پرەزيدەنت ترامپ بۇرىنعى پرەزيدەنت دجو بايدەننىڭ ەلەكتروموبيلدەرگە كوشۋ جوسپارىن رەسمي تۇردە توقتاتىپ، قۋاتتاۋ ستانتسيالارىنا بولىنگەن سۋبسيديالاردى قىسقارتتى.
2021 جىلى دجو بايدەننىڭ قابىلداعان «2030 جىلعا قاراي ەلەكترلى كولىك ساۋداسىنىڭ ۇلەسىن 50%-عا جەتكىزۋ» تۋرالى قاۋلىسىنىڭ كۇشى جويىلدى. بۇل شەشىم فەدەرالدىق اگەنتتىكتەرگە جاڭا قۋاتتاۋ ستانتسيالارىن سالۋعا بولىنگەن 5-7.5 ميلليارد دوللاردى پايدالانۋعا تىيىم سالۋدى كوزدەيدى.
سونىمەن قاتار، ترامپ اكىمشىلىگى ەلەكتروموبيلدەرگە بەرىلەتىن 7,500 دوللار كولەمىندەگى جەڭىلدىكتەردى الىپ تاستاۋ جانە ەكولوگيالىق ستاندارتتاردى جەڭىلدەتۋ تۋرالى ۇسىنىستاردى قاراستىرۋدا. پرەزيدەنت بۇل شارالاردى «وتاندىق وندىرۋشىلەردى قورعاۋ» جانە «ەلەكتروموبيلدەردى نارىققا ءماجبۇرلى تۇردە ەنگىزۋدىڭ دۇرىس ەمەستىگىن» دالەلدەپ، 2019 جىلعى ستاندارتتارعا قايتا ورالۋدى ءجون كوردى.
ترامپ مەكسيكا مەن كانادادان يمپورتتالاتىن اۆتوكولىكتەرگە 25% باج سالىعىن ەنگىزۋدى جوسپارلاپ وتىر. بۇل شەشىم اسىرەسە Volkswagen سياقتى كومپانيالارعا قيىندىق تۋدىرادى. نەمىس اۆتوكونتسەرنى بۇل جاڭا سالىقتاردىڭ بيزنەستى ءتيىمسىز ەتەتىنىن ايتىپ، الاڭداۋشىلىق ءبىلدىردى. نەمىس اۆتووندىرۋشىلەر قاۋىمداستىعى (VDA) جاڭا باج سالىعى كولىكتەردىڭ باعاسىنىڭ وسۋىنە جانە ينفلياتسيانىڭ ارتۋىنا الىپ كەلەتىنىن مالىمدەدى.
سونىمەن بىرگە، Stellantis كونتسەرنى باسشىسى دجون ەلكانن بۇل ماسەلەلەر بويىنشا پرەزيدەنتپەن بىرنەشە رەت كەزدەسۋ وتكىزگەنى تۋرالى بەيرەسمي اقپارات تارادى. Stellantis ساۋداسىنىڭ 40%-ى اقش-قا يمپورتتالاتىن كولىكتەردەن قۇرالادى.
جاڭا شارالاردىڭ سالدارىنان Volkswagen ەلەكتروموبيلدەرىن جاھاندىق نارىققا شىعارۋ جوسپارلارىن كەيىنگە قالدىردى. Land Rover دا ەلەكترلى Defender ءوندىرىسىن كەيىنگە قالدىرعانىن مالىمدەدى. ساراپشىلار بۇل جاعدايدى جاڭا پلاتفورمالاردىڭ تەحنيكالىق مۇمكىندىكتەرىنىڭ شەكتەۋلىگىمەن ءتۇسىندىردى.
