Til saıasaty komıteti “Qazaqstan Respýblıkasynda til saıasatyn damytýdyń 2023-2029 jyldarǵa arnalǵan tujyrymdasyn bekitý týraly” Úkimet qaýlysynyń jobasyn daıyndady, dep habarlaıdy “Adyrna” ulttyq portaly.
Qujat memlekettik tildi qoǵamnyń barlyq salasynda qoldaný aıasyn keńeıtýge jáne onyń mártebesin arttyrýǵa tikeleı yqpal etedi dep kórsetilgen.
Tujyrymdamanyń maqsatyna qol jetkizý sheńberinde 13 negizgi nysanaly ındıkator jáne 5 kútiletin nátıje aıqyndalǵan.
2029 jylǵa qaraı kútiletin negizgi nátıjeler:
- 84% – respýblıka boıynsha qazaq tilinde sóıleıtin turǵyndardyń úlesi;
- 32% – úsh tilde sóıleıtin turǵyndardyń úlesi;
- 15% – jańa álipbı men emle erejesin oqytý kýrsymen qamtylǵan turǵyndar úlesi;
- 94% – ortalyq memlekettik jáne jergilikti atqarýshy organdardyń memlekettik tilde is júrgizý úlesi;
- 40% – qazaq tiliniń latyngrafıkaly álipbıiniń emle erejesine negizdelgen termınologııalyq qordyń úlesi (ósý qorytyndysymen).
Tujyrymdama 6 bólimnen jáne is-qımyl josparynan turady.
Qujatta qazaq álipbıin latyn grafıkasyna kóshirý jumystary qazaq álipbıi men emle erejesi tıisti normatıvtik qujattarmen bekitilgennen keıin kezeń-kezeńimen iske asyrylatyny jazylǵan.
“Qazaq álipbıin latyn grafıkasyna kóshirý máselesinde kelesi problemalar bar:
- qazaq álipbıi men emle erejeleri tıisti normatıvtik qujattarmen bekitilmedi;
- keıbir ǵalymdardyń, qoǵam músheleriniń álipbı quramyndaǵy keıbir tańbalarǵa baılanysty pikir alshaqtyǵy bar;
- qoǵamnyń tildik árkelkiligine baılanysty latyn álipbıin engizý uzaq merzimge sozylýy múmkin;
- latyn álipbıin engizý tóńireginde BAQ-ta ony qabyldaýdyń jaǵymsyz tustary jóninde sýbektıvti pikirler kóp”, - delingen tujyrymdamada.
Tujyrymdamany talqylaý 25 sáýirge deıin jalǵasady.
