جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلداندى. بۇل تۋرالى قر اۋىل شارۋاشىلىعى مينيسترلىگىنىڭ جەر رەفورماسى جونىندەگى كوميسسيا وتىرىسىندا قر پرەمەر-ءمينيسترىنىڭ ورىنباسارى ەرالى توعجانوۆ ايتتى، دەپ جازدى قازاقپارات.
«25 اقپاندا ۇلتتىق قوعامدىق سەنىم كەڭەسىنىڭ بەسىنشى وتىرىسىندا قر پرەزيدەنتى قاسىم-جومارت توقاەۆتىڭ اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسى بار عىلىمي ورتالىقتارعا، سونداي-اق قانداستارعا بەرۋگە تولىق تىيىم سالۋ تۋرالى ساياسي شەشىمى ارنايى زاڭ جوباسى رەتىندە پارلامەنتتىڭ قاراۋىنا 12 ناۋرىزدا ەنگىزىلدى. زاڭ جوباسىنىڭ ءبىرىنشى وقىلىمى ماجىلىستە 7 ساۋىردە وتەدى»، - دەيدى قر پرەمەر-ءمينيسترىنىڭ ورىنباسارى ەرالى توعجانوۆ.
ونىڭ ايتۋىنشا، كوپشىلىك اراسىندا، اسىرەسە الەۋمەتتىك جەلىلەردە ءالى دە جەكەلەگەن تۇسىنىسپەۋشىلىكتەر تارالىپ ءجۇر. «جالعان قاۋەسەتتى ادەيى تاراتۋشىلار دا جوق ەمەس ەكەنىن ايتۋىمىز كەرەك. سوندىقتان تاعى ءبىر ناقتىلاپ ايتامىن: جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلداندى.
مەملەكەت باسشىسى قاسىم-جومارت كەمەلۇلى قوعام تاراپىنان كوتەرىلىپ وتىرعان نەگىزگى ماسەلەلەر بويىنشا ءتۇيىندى شەشىمىن ايتىپ، نۇكتەسىن قويدى. قازىرگى تاڭدا كوميسسيا الدىندا اۋىل شارۋاشىلىعى سالاسىنداعى جەر قاتىناستارىن دامىتۋ ماسەلەسى بويىنشا ۇسىنىمدار ازىرلەۋ مىندەتى تۇر. ەندى وسى ماسەلەلەردى جان-جاقتى اقىلداسقانىمىز دۇرىس»، - دەدى ول.
"ادىرنا" ۇلتتىق پورتالى
©قازاقپارات
