پارلامەنت ءماجىلىسىنىڭ دەپۋتاتى كونستانتين اۆەرشين بلوگەرلەر مەن قوعامدا بەلسەندى پىكىر بىلدىرۋشىلەردى اسكەرگە شاقىرۋ كەرەك دەپ سانايدى، دەپ جازادى "ادىرنا" ۇلتتىق پورتالى.
بۇل تۋرالى ول قورعانىس مينيسترىنە باعىتتاعان دەپۋتاتتىق ساۋالىندا ايتتى.
«قازىر قارۋلى كۇشتەردىڭ جاعدايى تۋرالى پىكىرتالاس شيەلەنىسىپ تۇر. وكىنىشكە قاراي، پىكىردى اسكەردە بورىشىن وتەپ جاتپاعان نە وتەپ كورمەگەن «ديۆان ساراپشىلارى» توپشىلايدى. بۇل تاقىرىپ جاۋاپكەرشىلىكپەن قاراۋدى تالاپ ەتەتىنى، قاڭقۋ سوزدەردى كوتەرمەيتىنى ايقىن. دەگەنمەن، قوعام قر قارۋلى كۇشتەرىنىڭ جاي-كۇيى تۋرالى حاباردار بولۋى تيىستىگىن ءتۇسىنۋ قاجەت. بۇل جەردە ماسەلە ۇلتتىق قاۋىپسىزدىكتى قامتاماسىز ەتۋگە دە، اسكەرگە شاقىرىلعانداردىڭ ءومىرى مەن دەنساۋلىعىنا دا قاتىستى بولىپ وتىر، ولار بىرەۋدىڭ بالاسى، ەندى بىرەۋدىڭ باۋىرى»، - دەدى كونستانتين اۆەرشين.
وسىلايشا، دەپۋتات اسكەر تۋرالى بلوگەرلەر مەن قوعامدىق پىكىر ايتۋشىلار تاراپىنان كوپشىلىككە جەتكىزىلەتىن اقپاراتتىڭ شىنايىلىعىن ارتتىرۋ ءۇشىن ۇسىنىس ءبىلدىردى.
«جالپىعا ورتاق اسكەري مىندەت جانە اسكەري قىزمەت زاڭناماسىنا سايكەس اسكەرگە شاقىرىلماعان (كەيىنگە قالدىرىلعان نە باسقا سەبەپتەرمەن) ازاماتتاردىڭ ەرىكتى تۇردە ءتيىستى اسكەري-مەديتسينالىق كوميسسيادان ءوتىپ، اسكەري بولىمدەردە ۋاقىتشا (1-3 اي) جەدەل اسكەري قىزمەت وتەۋىنە مۇمكىندىك بەرۋدى قاراستىرۋ كەرەك»، - دەدى ول.
ايتۋىنشا، بۇل شارا بلوگەرلەر مەن قوعامدىق پىكىر كوشباسشىلارى قاتارىنان اسكەري قىزمەتتى وتكەرۋ اسپەكتىلەرىن شىنايى جاريالاۋعا شىنىمەن مۇددەلى ادامدارعا ارميا اتموسفەراسىنا ەنۋگە مۇمكىندىك بەرەدى.
«ال، قوعام ولاردان قارۋلى كۇشتەر تۋرالى تىكەلەي اقپارات الادى. سونىمەن قاتار، بۇل شارا اسكەرگە بارۋعا نيەت بىلدىرۋشىلەرگە، ناعىز پاتريوتتارعا ءىس جۇزىندە ەلدىڭ قورعانىس قابىلەتىن نىعايتۋعا ءوز ۇلەسىن قوسۋىنا مۇمكىندىك بەرەدى. وسىلايشا، اسكەري قىزمەتتىڭ ناعىز قيىندىعى مەن اۋىرتپالىعىن سەزىنەدى. مەنىڭ ويىمشا، بۇل ولاردىڭ دۇنيەتانىمىنداعى كوپ نارسەنى وزگەرتەدى»، - دەدى دەپۋتات.
سونداي-اق، بۇل باستاما جەدەل اسكەري قىزمەت وتكەرمەگەن، قولىنا اۆتومات ۇستاماعان ازاماتتاردىڭ ەڭ بولماعاندا، باستاپقى اسكەري دايارلىقتان وتۋىنە مۇمكىندىك تۋعىزباق.
«قورعانىس مينيسترلىگىنە وسى ماسەلەنى قاراۋدى، نورماتيۆتىك-قۇقىقتىق اكتىلەرگە، بۇيرىقتارعا ءتيىستى وزگەرىستەر ەنگىزۋ تۋرالى ۇسىنىستار دايىنداۋدى، قاجەت بولعان جاعدايدا ازاماتتاردىڭ اسكەري جيىنداردان وتۋىنە قاتىستى جاڭا بۇيرىقتار ازىرلەۋدى ۇسىنامىن»، - دەدى كونستانتين اۆەرشين.
