قازاقستان پرەزيدەنتى قاسىم-جومارت توقاەۆ جانۋارلارعا جاۋاپكەرشىلىكپەن قاراۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى زاڭعا قول قويدى. بۇل قۇجات قاڭعىباس يتتەر مەن مىسىقتارعا قاتىستى قۇقىقتىق رەجيمدى وزگەرتەدى، دەپ حابارلايدى "ادىرنا".
زاڭ قولدانىستاعى «جانۋارلارعا جاۋاپكەرشىلىكپەن قاراۋ تۋرالى» زاڭدى تولىقتىرىپ، ءبىر جاعىنان قاتىگەزدىك ءۇشىن جاۋاپكەرشىلىكتى كۇشەيتسە، ەكىنشى جاعىنان پاناجايلاردا شەكتەۋلى مەرزىم ۇستالعاننان كەيىن قاراۋسىز جانۋارلاردى ەۆتانازيالاۋعا مۇمكىندىك بەرەتىن تەتىكتى ەنگىزەدى.
مامىر ايىنىڭ باسىندا بۇل تۇزەتۋلەردى ءماجىلىس پەن سەنات دەپۋتاتتارى ماقۇلداعان بولاتىن. ەندى جەرگىلىكتى اكىمدىكتەر مەن ءماسليحاتتار جانۋارلاردى ۇستاۋ ەرەجەلەرىن جانە قاڭعىباس يت پەن مىسىقتاردى ۋاقىتشا ۇستاۋ پۋنكتتەرىندە قانشا ۋاقىت بولاتىنىن وزدەرى بەلگىلەي الادى.
سونداي-اق جانۋاردىڭ يەسى بار-جوعىن انىقتايتىن بەلگىلەرى كەڭەيتىلدى. بۇرىن تەك ءچيپتىڭ بولۋى ەسەپكە الىنسا، ەندى مويىنباۋ (وشەينيك), بەلگى (بيركا) جانە سىرتقى كەلبەت تە ەسكەرىلەتىن بولادى.
"ەۆتانازيا" ۇعىمى دا ناقتىلاندى. ەندى ول تەك ۆەتەرينار دارىگەردىڭ قورىتىندىسى نەگىزىندە جانە تەك مەديتسينالىق كورسەتكىشتەر بويىنشا جانۋاردى جانسىزداندىرۋ رەتىندە قاراستىرىلادى. سونىمەن قاتار قاڭعىباس جانۋارلار سانىن رەتتەۋ ءتارتىبى جەرگىلىكتى اكىمدىكتەر دەڭگەيىنە بەرىلدى.
دەپۋتات ەدىل جاڭبىرشين ىلگەرىلەتكەن بۇل تۇزەتۋلەر قوعامدا قىزۋ پىكىرتالاس تۋدىردى. نەگىزگى داۋ ەۆتانازيا ماسەلەسىنەن شىقتى. جانۋارلاردى قورعاۋشىلار بۇعان دەيىنگى جاپپاي ۇيىقتاتۋ تاجىريبەسىن قايتارۋعا قارسى شىعىپ، وسۆۆ (اۋلاۋ–ستەريلدەۋ–ۆاكتسيناتسيا–قايتارۋ) جۇيەسىن ساقتاۋدى تالاپ ەتتى.
ناتيجەسىندە قولدانىستاعى قايتارىمسىز اۋلاۋ مودەلى ساقتالدى. بىراق ەۆتانازيا تەك مەديتسينالىق نەگىز بولعان جاعدايدا جانە ۆەتەريناردىڭ قورىتىندىسىمەن عانا رۇقسات ەتىلەتىنى بولەك بەكىتىلدى.
سونداي-اق بۇعان دەيىن دەپۋتاتتار جانۋارلاردى ۇستاۋ مەن سەرۋەندەتۋ ەرەجەلەرىن بۇزعانى ءۇشىن يەلەردىڭ جاۋاپكەرشىلىگىن كۇشەيتۋدى ۇسىنعان ەدى.
سەنات كۋلۋارىندا جۋرناليستەر ايىپپۇلدارعا قاتىستى ناقتىلادى. ۆيتسە-مينيستر نۇركەن شاربيەۆ اكىمشىلىك قۇقىق بۇزۋشىلىق تۋرالى كودەكستىڭ 407-1-بابىن ("جانۋارلارعا قاتىگەزدىك كورسەتۋ") قاتاڭداتۋ جوسپارلانىپ وتىرعانىن ايتتى.
ەگەر قىلمىستىق قۇرام بولماسا:
- جەكە تۇلعالار ءۇشىن ايىپپۇل 5-تەن 30 اەك-كە دەيىن (21 625-تەن 129 750 تەڭگەگە دەيىن);
- لاۋازىمدى تۇلعالار ءۇشىن 10-نان 50 اەك-كە دەيىن (43 250-دەن 216 250 تەڭگەگە دەيىن).
قايتالانعان جاعدايدا:
- جەكە تۇلعالارعا 20-دان 50 اەك-كە دەيىن (86 500–216 250 تەڭگە);
- لاۋازىمدى تۇلعالارعا 40-تان 100 اەك-كە دەيىن (173 000–432 500 تەڭگە) ايىپپۇل سالىنادى..
شاربيەۆتىڭ ايتۋىنشا، ايىپپۇلدار بارلىق دەڭگەيدە شامامەن 2,5 ەسە وسەدى.
سونداي-اق جانۋارلاردى اۋلاۋ، پاناجايلاردا ۇستاۋ جانە سەرۋەندەتۋ ەرەجەلەرىن بۇزعانى ءۇشىن دە ايىپپۇلداردى ارتتىرۋ ۇسىنىلدى:
- جەكە تۇلعالار ءۇشىن 10-نان 15 اەك-كە دەيىن (43 250–64 875 تەڭگە);
- لاۋازىمدى تۇلعالار ءۇشىن 20-دان 30 اەك-كە دەيىن (86 500–129 750 تەڭگە);
- زاڭدى تۇلعالار ءۇشىن 30-دان 40 اەك-كە دەيىن (129 750–173 000 تەڭگە).
قايتالانعان قۇقىق بۇزۋشىلىقتار ءۇشىن:
- جەكە تۇلعالارعا 20-دان 30 اەك-كە دەيىن (86 500–129 750 تەڭگە);
- لاۋازىمدى تۇلعالارعا 30-دان 60 اەك-كە دەيىن (129 750–259 500 تەڭگە);
- زاڭدى تۇلعالارعا 40-تان 80 اەك-كە دەيىن (173 000–346 000 تەڭگە) ايىپپۇل قاراستىرىلعان.
