Parlament Májilisiniń depýtaty Konstantın Avershın blogerler men qoǵamda belsendi pikir bildirýshilerdi áskerge shaqyrý kerek dep sanaıdy, dep jazady "Adyrna" ulttyq portaly.
Bul týraly ol Qorǵanys mınıstrine baǵyttaǵan depýtattyq saýalynda aıtty.
«Qazir Qarýly kúshterdiń jaǵdaıy týraly pikirtalas shıelenisip tur. Ókinishke qaraı, pikirdi áskerde boryshyn ótep jatpaǵan ne ótep kórmegen «dıvan sarapshylary» topshylaıdy. Bul taqyryp jaýapkershilikpen qaraýdy talap etetini, qańqý sózderdi kótermeıtini aıqyn. Degenmen, qoǵam QR Qarýly kúshteriniń jaı-kúıi týraly habardar bolýy tıistigin túsiný qajet. Bul jerde másele ulttyq qaýipsizdikti qamtamasyz etýge de, áskerge shaqyrylǵandardyń ómiri men densaýlyǵyna da qatysty bolyp otyr, olar bireýdiń balasy, endi bireýdiń baýyry», - dedi Konstantın Avershın.
Osylaısha, depýtat ásker týraly blogerler men qoǵamdyq pikir aıtýshylar tarapynan kópshilikke jetkiziletin aqparattyń shynaıylyǵyn arttyrý úshin usynys bildirdi.
«Jalpyǵa ortaq áskerı mindet jáne áskerı qyzmet zańnamasyna sáıkes áskerge shaqyrylmaǵan (keıinge qaldyrylǵan ne basqa sebeptermen) azamattardyń erikti túrde tıisti áskerı-medıınalyq komıssııadan ótip, áskerı bólimderde ýaqytsha (1-3 aı) jedel áskerı qyzmet óteýine múmkindik berýdi qarastyrý kerek», - dedi ol.
Aıtýynsha, bul shara blogerler men qoǵamdyq pikir kóshbasshylary qatarynan áskerı qyzmetti ótkerý aspektilerin shynaıy jarııalaýǵa shynymen múddeli adamdarǵa armııa atmosferasyna enýge múmkindik beredi.
«Al, qoǵam olardan Qarýly kúshter týraly tikeleı aqparat alady. Sonymen qatar, bul shara áskerge barýǵa nıet bildirýshilerge, naǵyz patrıottarǵa is júzinde eldiń qorǵanys qabiletin nyǵaıtýǵa óz úlesin qosýyna múmkindik beredi. Osylaısha, áskerı qyzmettiń naǵyz qıyndyǵy men aýyrtpalyǵyn sezinedi. Meniń oıymsha, bul olardyń dúnıetanymyndaǵy kóp nárseni ózgertedi», - dedi depýtat.
Sondaı-aq, bul bastama jedel áskerı qyzmet ótkermegen, qolyna avtomat ustamaǵan azamattardyń eń bolmaǵanda, bastapqy áskerı daıarlyqtan ótýine múmkindik týǵyzbaq.
«Qorǵanys mınıstrligine osy máseleni qaraýdy, normatıvtik-quqyqtyq aktilerge, buıryqtarǵa tıisti ózgerister engizý týraly usynystar daıyndaýdy, qajet bolǵan jaǵdaıda azamattardyń áskerı jıyndardan ótýine qatysty jańa buıryqtar ázirleýdi usynamyn», - dedi Konstantın Avershın.
