تيمۋر قۇلىباەۆتىڭ Halyk قايىرىمدىلىق قورى جۇزەگە اسىرىپ جاتقان Auyl Sport جوباسىنىڭ جەڭىمپازى نازەركە بولاتبەك حالىقارالىق ارەنادا قازاقستاننىڭ مەرەيىن ۇستەم ەتتى. جاس سپورتشى تاشكەنت قالاسىندا ۇستەل تەننيسىنەن وتكەن WTT Youth Contender Tashkent 2026 حالىقارالىق تۋرنيرىندە كۇمىس جۇلدەگەر اتاندى.
تۇركىستان وبلىسى جەتىساي اۋدانىنا قاراستى اسىقاتا اۋىلىنان شىققان نازەركە 11 جاسقا دەيىنگى قىزدار اراسىندا ونەر كورسەتىپ، الەمنىڭ ءار ەلىنەن كەلگەن قارسىلاستارىمەن تارتىستى ويىن وتكىزدى. ناتيجەسىندە قازاقستان قورجىنىنا كۇمىس مەدال سالدى.
13-16 مامىر ارالىعىندا وزبەكستان استاناسىنداعى «Yunusobod» سپورت كەشەنىندە ۇيىمداستىرىلعان بەدەلدى حالىقارالىق دوداعا 500-گە جۋىق سپورتشى قاتىستى. تۋرنيردە قازاقستان، وزبەكستان، قىتاي، وڭتۇستىك كورەيا، ءۇندىستان، تۇركيا، ساۋد ارابياسى، گونكونگ جانە باسقا دا مەملەكەتتەردىڭ جاس تەننيسشىلەرى باق سىنادى.
قازاقستان قۇراماسى ساپىندا بۇل جارىسقا Auyl Sport 2025 رەسپۋبليكالىق ءتۋرنيرىنىڭ جەڭىمپازدارى اتانعان تۇركىستان وبلىسىنىڭ ءتورت جاس سپورتشىسى قاتىستى. قاتىسۋشىلاردىڭ جول ءجۇرۋ، جاتىن ورىن، تاماقتانۋ جانە تۋرنيرگە قاتىسۋ شىعىندارىن Halyk قايىرىمدىلىق قورى تولىقتاي ءوز موينىنا الدى.
«بۇل جارىس ماعان ۇلكەن تاجىريبە سىيلادى. الەمنىڭ ءار تۇكپىرىنەن كەلگەن مىقتى سپورتشىلارمەن ويناۋ وڭاي بولعان جوق. بىراق اۋىلدان شىققان بالالاردىڭ دا حالىقارالىق دەڭگەيدە جەڭىسكە جەتە الاتىنىن دالەلدەگىم كەلدى. Auyl Sport جوباسىنا، باپكەرلەرىمە جانە اتا-اناما العىس ايتامىن»، – دەدى نازەركە بولاتبەك.
ايتا كەتەيىك، Halyk قايىرىمدىلىق قورى تۇركىستان وڭىرىندە اۋىل سپورتىن دامىتۋمەن قاتار، الەۋمەتتىك جانە مادەني جوبالاردى دا جۇيەلى تۇردە جۇزەگە اسىرىپ كەلەدى. قور جاقىندا تۇركىستان وبلىسىنداعى تاريحي-مادەني مۇرا نىساندارىنىڭ ءبىرى - بابا تۇكتى شاشتى ءازيز كەسەنەسىن تولىق قايتا جاڭعىرتۋ جوباسىن باستادى. جوبانىڭ جالپى قۇنى 200 ميلليون تەڭگەدەن اسادى، قۇرىلىس جۇمىستارى التى اي ىشىندە اياقتالادى دەپ جوسپارلانعان.
نازەركەنىڭ جەتىستىگى اۋىل سپورتىنا كورسەتىلىپ جاتقان قولداۋدىڭ ناقتى ناتيجەسى. مۇنداي باستامالار شالعاي اۋىلداعى تالانتتى بالالارعا ۇلكەن سپورتقا جول اشىپ، حالىقارالىق ارەنادا ەل نامىسىن قورعاۋعا مۇمكىندىك بەرەدى.
