ماڭعىستاۋدا جاڭاوزەن قالاسى تۇرعىندارىنىڭ ءبىر توبى اكىمدىك عيماراتىنىڭ الدىنا جينالىپ، استانادا ارنايى جاساق بۇگىن ۇستاپ اكەتكەن مۇنايشىلاردى بوساتۋدى تالاپ ەتىپ جاتىر، دەپ حابارلايدى «ادىرنا» ۇلتتىق پورتالى.
ۋاقىت وتكەن سايىن اكىمدىك الدىنا جينالعان جاڭاوزەندىكتەردىڭ سانى ارتقان ۇستىنە ارتۋدا.
سونىمەن قاتار، ايماقتاعى بىرنەشە مۇناي كومپانيالارى جۇمىسىن توقتاتتى. وسىلايشا ۇستالعان جاڭاوزەندىكتەردىڭ ۋاجىمەن تولىق كەلىسەتىندىگىن ءبىلدىرىپ، ولاردى بوساتۋدى تالاپ ەتتى.
جاڭاوزەن قالاسىنىڭ بەلسەندىسى، بۇرىن ءماجىلىس دەپۋتاتتىعىنا ۇمىتكەر بولعان مۇراتباي جۇماعاليەۆ بيلىككە قاراتا ۇندەۋ جاسادى. ول قالادا ينتەرنەتتىڭ دۇرىس جۇمىس ىستەمەيتىنىن جانە ەمىس-ەمىس تەلەفون بايلانىسى ۇزىلەتىندىگىن حابارلادى.
ەسكە سالا كەتەيىك، كەشكى ساعات 8-دەن كەيىن استاناداعى ەنەرگەتيكا مينيسترلىگى عيماراتىنىڭ الدىنا جاڭاوزەندەگى "بەرالى ماڭعىستاۋ Company" مۇناي كومپانياسىنىڭ 80-گە جۋىق قىزمەتكەرى جينالدى. ولار مينيسترلىك الدىندا تۇنەپ، اشىق تالاپ قويدى.
بۇگىن ەنەرگەتيكا مينيسترلىگى عيماراتىنىڭ الدىندا 200-دەن استام ادام جينالدى.
قمگ مەن ەنەرگەتيكا مينيسترلىگى جاڭاوزەندىكتەرگە جاعدايدى شەشۋدىڭ بالاما جولدارىن ۇسىنسا دا، نارازىلىق بىلدىرۋشىلەردىڭ وزدەرى باسقا كومپانيادا جۇمىس ىستەۋدەن باس تارتقانىن مالىمدەگەن ەدى.
مينيستر الماسادام ساتقاليەۆ مۇنى تەندەردەن ۇتىلعان كومپانيانىڭ ايلا-شارعىسى دەپ سانايتىنىن ايتتى.
سەيسەنبى كۇنى كەشكە بارلىق نارازىلىق بىلدىرۋشىلەر قالىڭ جاساقتىڭ كۇشىمەن ۇستالىپ، پوليتسيا مەكەمەسىنە جۇك كولىگىمەن جەتكىزىلدى.
ءىىم مۇنايشىلاردىڭ قازىرگى جاعايىنا قاتىستى ازىرگە ەشقانداي اقپارات بەرگەن جوق.
"ادىرنا" ۇلتتىق پورتالى
