Mańǵystaýda Jańaózen qalasy turǵyndarynyń bir toby ákimdik ǵımaratynyń aldyna jınalyp, Astanada arnaıy jasaq búgin ustap áketken munaıshylardy bosatýdy talap etip jatyr, dep habarlaıdy «Adyrna» ulttyq portaly.
Ýaqyt ótken saıyn ákimdik aldyna jınalǵan jańaózendikterdiń sany artqan ústine artýda.
Sonymen qatar, aımaqtaǵy birneshe munaı kompanııalary jumysyn toqtatty. Osylaısha ustalǵan jańaózendikterdiń ýájimen tolyq kelisetindigin bildirip, olardy bosatýdy talap etti.
Jańaózen qalasynyń belsendisi, buryn Májilis depýtattyǵyna úmitker bolǵan Muratbaı Jumaǵalıev bılikke qarata úndeý jasady. Ol qalada ınternettiń durys jumys istemeıtinin jáne emis-emis telefon baılanysy úziletindigin habarlady.
Eske sala keteıik, keshki saǵat 8-den keıin Astanadaǵy Energetıka mınıstrligi ǵımaratynyń aldyna Jańaózendegi "Beraly Mańǵystaý Company" munaı kompanııasynyń 80-ge jýyq qyzmetkeri jınaldy. Olar mınıstrlik aldynda túnep, ashyq talap qoıdy.
Búgin Energetıka mınıstrligi ǵımaratynyń aldynda 200-den astam adam jınaldy.
QMG men Energetıka mınıstrligi jańaózendikterge jaǵdaıdy sheshýdiń balama joldaryn usynsa da, narazylyq bildirýshilerdiń ózderi basqa kompanııada jumys isteýden bas tartqanyn málimdegen edi.
Mınıstr Almasadam Satqalıev muny tenderden utylǵan kompanııanyń aıla-sharǵysy dep sanaıtynyn aıtty.
Seısenbi kúni keshke barlyq narazylyq bildirýshiler qalyń jasaqtyń kúshimen ustalyp, polıııa mekemesine júk kóligimen jetkizildi.
IIM munaıshylardyń qazirgi jaǵaıyna qatysty ázirge eshqandaı aqparat bergen joq.
"Adyrna" ulttyq portaly
