باس پروكۋراتۋرا كاسىپكەر بولات نازارباەۆتىڭ بۇرىنعى توقالى ءارى ءانشى دينارا ءالجاننىڭ سۇحباتتا ايتقان دەرەكتەرىن تەكسەرۋ ءۇشىن ەكى بىردەي ورگانعا سۇراۋ جولدانىپ، قىلمىستىق ءىس قوزعاۋ ماسەلەسى قاراستىرىلىپ جاتقانىن حابارلادى، دەپ جازدى "ادىرنا" ۇلتتىق پورتالى Massaget.kz-كە سىلتەمە كورسەتە وتىرىپ.
باس پروكۋراتۋرا ءانشى دينارا ءالجاننىڭ جۋرناليست نۇرسەيىت جىلقىشىبايدىڭ "ۋاقىت كورسەتەدى" YouTube-ارناسىنداعى سۇحباتتا ايتقان بىرنەشە فاكتىلەرىن تەكسەرۋدى قولعا الدى. سونىمەن قاتار، قىلمىستىق ءىس قوزعاۋ ماسەلەسىنىڭ قاراستىرىلىپ جاتقانىن مالىمدەدى.
قازىردە كەڭىنەن اقتارىلعان، بۇكپەسىز سۇحبات بارىسىنداعى دەرەكتەرگە تەكسەرىس جۇرگىزۋ ءۇشىن قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى جانە قازاقستان رەسپۋبليكاسى ىشكى ىستەر مينيسترلىگىنە ءوتىنىم جولدانعان.
ەسكە سالا كەتەيىك، بەلگىلى زاڭگەر الماس جۇماعالي بولات نازارباەۆتىڭ بۇرىنعى توقالى ءارى ءانشى دينارا ءالجاننىڭ "ۋاقىت كورسەتەدى" YouTube-ارناسىندا ايتقان دەرەكتەرىن العا تارتىپ، قانداي قىلمىستىق ءىس قوزعاۋعا بولاتىنىن ايتقان ەدى.
"بىرىنشىدەن، كەنتال ء(انشى تالعات كەنجەبولاتوۆ - ەسك.) مەن "كومانداسىنىڭ" ەسىرتكىگە قاتىسى. ەكىنشىدەن، عابيدوللانىڭ (شىمكەنت قالاسىنىڭ ەكس-اكىمى عابيدوللا ءابدىراحىموۆ) قىزمەتتىك وكىلەتتىگىن اسىرا پايدالانۋ ما، الدە كاسىپكەرلىك قىزمەتكە زاڭسىز ارالاسۋ ما، ونى تەكسەرىس انىقتاۋ كەرەك. بولات نازارباەۆتىڭ قارجىلاردى وڭدى-سولدى شاشۋى، كازينودان ۇتىلىپ قالعان قايرات نۇرتاس ءۇشىن 400 000 دوللار بەرە سالۋى - قارجىنىڭ شىعۋ تەگىنىڭ زاڭدىلىعى انىقتالۋ كەرەك". ول ساندىراق ەمەس، جىلقىشىباي باسىندا سۇراپ الدى: "ەرتەڭ سوزدەرىڭىزدەن تايىپ، انا جەرىن، مىنا جەرىن الىپ تاستاش", - دەپ سۇرامايسىڭ با؟ - دەپ", - دەگەن ەدى زاڭگەر.
باس پروكۋراتۋرا الداعى ۋاقىتتا اتالعان قوس ورگاننىڭ بۇل ماسەلەگە قاتىستى تەكسەرۋ ناتيجەسىن جاريالاپ، كوپشىلىكتى قۇلاعدار ەتەتىندىگىن ايتتى.
"ادىرنا" ۇلتتىق پورتالى
