Bas prokýratýra kásipker Bolat Nazarbaevtyń burynǵy toqaly ári ánshi Dınara Áljannyń suhbatta aıtqan derekterin tekserý úshin eki birdeı organǵa suraý joldanyp, qylmystyq is qozǵaý máselesi qarastyrylyp jatqanyn habarlady, dep jazdy "Adyrna" ulttyq portaly Massaget.kz-ke silteme kórsete otyryp.
Bas prokýratýra ánshi Dınara Áljannyń jýrnalıst Nurseıit Jylqyshybaıdyń "Ýaqyt kórsetedi" YouTube-arnasyndaǵy suhbatta aıtqan birneshe faktilerin tekserýdi qolǵa aldy. Sonymen qatar, qylmystyq is qozǵaý máselesiniń qarastyrylyp jatqanyn málimdedi.
Qazirde keńinen aqtarylǵan, búkpesiz suhbat barysyndaǵy derekterge tekseris júrgizý úshin Qazaqstan Respýblıkasynyń Sybaılas jemqorlyqqa qarsy is-qımyl agenttigi jáne Qazaqstan Respýblıkasy Ishki ister mınıstrligine ótinim joldanǵan.
Eske sala keteıik, belgili zańger Almas Jumaǵalı Bolat Nazarbaevtyń burynǵy toqaly ári ánshi Dınara Áljannyń "Ýaqyt kórsetedi" YouTube-arnasynda aıtqan derekterin alǵa tartyp, qandaı qylmystyq is qozǵaýǵa bolatynyn aıtqan edi.
"Birinshiden, Kental (ánshi Talǵat Kenjebolatov - esk.) men "komandasynyń" esirtkige qatysy. Ekinshiden, Ǵabıdollanyń (Shymkent qalasynyń eks-ákimi Ǵabıdolla Ábdirahymov) qyzmettik ókilettigin asyra paıdalaný ma, álde kásipkerlik qyzmetke zańsyz aralasý ma, ony tekseris anyqtaý kerek. Bolat Nazarbaevtyń qarjylardy ońdy-soldy shashýy, kazınodan utylyp qalǵan Qaırat Nurtas úshin 400 000 dollar bere salýy - qarjynyń shyǵý teginiń zańdylyǵy anyqtalý kerek". Ol sandyraq emes, Jylqyshybaı basynda surap aldy: "Erteń sózderińizden taıyp, ana jerin, myna jerin alyp tastash", - dep suramaısyń ba? - dep", - degen edi zańger.
Bas prokýratýra aldaǵy ýaqytta atalǵan qos organnyń bul máselege qatysty tekserý nátıjesin jarııalap, kópshilikti qulaǵdar etetindigin aıtty.
"Adyrna" ulttyq portaly
