Aqmola oblysy, Arbýzınka aýyly irgesindegi Sarqyrama ózeni tasyp, joldy shaıyp ketti. Saldarynan eki júzge jýyq turǵyn syrtqa shyǵa almaı, o dúnıelik bolǵandardy aqtyq saparǵa qaıyqpen attandyrýǵa májbúr, dep habarlaıdy "Adyrna" ulttyq portaly KTK telearnasyna silteme jasap.
Aqmola oblysynda Sarqyrama ózeni arnasynan asyp, aýyldy "qyspaqqa aldy". Turǵyndardyń kún kózin kórip, syrtqa shyǵýynyń ózi muńǵa aınalǵandaı. Tipti, ómirden ozǵan jaqyndaryn aýyl zıratyna qaraı qaıyqpen attandyryp, qyzyl sýdyń sabasyna túskenin kútip júr.
KTK telearnasynyń jazýynsha, aýyldaǵylar máıitti arǵy bette qalǵan zıratqa jetkizý úshin eskekti qaıyqqa salyp jibergenimen, kópshiligi syrtta janyn shúberekke túıýmen bolady. Óıtkeni qalt-qult etken eski qaıyqtyń ózi qyryq jamaý. Sarqyrama ózeni janaı ótetin Arbýzınka aýylynyń turǵyndary jyl saıyn, kóktemde, kóretin kúnimiz osy dep otyr. Bir aptadan beri 30 oqýshy da kórshi aýyldaǵy mektepke jete almaǵan. Munda medıına pýnkti de joq. Sandyqtaý aýdanynyń shendileri qoldan keler qaıran joq, 200 metrge jetetin kópir salýǵa keminde 1 jarym mıllıard teńge qajet deıdi. Sondyqtan, kún jylynyp, sý aǵyp ketkenin kútkennen basqa amal joq.
Aýdandaǵy tótenshe jaǵdaılar bóliminiń basshysy buǵan qatysty mynandaı pikir bildirdi:
“Arbýzınka aýyly bıik jerde turǵandyqtan, úılerge sý kirgen joq. Sarqyrama ózenindegi muz erigen kezde jylda osyndaı jaǵdaı oryn alady. Turǵyndar azyq-túlikpen qamtamasyz etilgen. Qazir sý deńgeıi aqyryn tómendep keledi. Sońǵy táýlikte aǵyn sý 20 santımetrge tústi. Qajet jaǵdaıda qaıyqpen tasymaldaımyz”, – dedi Sandyqtaý aýdany TJB bastyǵy Áset Janǵojın.
"Adyrna" ulttyq portaly
