Cەنات دەپۋتاتتارى كەشە قۇتقارۋشىلاردىڭ الەۋمەتتىك مارتەبەسى، جالاقىسى مەن زەينەتكە شىعۋ جاسىنا قاتىستى ساۋال جولدادى. ساۋالعا رەسمي تۇردە جاۋاپ قاتقان ۇكىمەت باسشىسى ءاليحان سمايىلوۆ قۇتقارۋشىلاردىڭ زەينەت جاسى تومەندەيتىنىن ءمالىم ەتتى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە كورسەتە وتىرىپ.
پرەمەر-مينيستر رەسمي مالىمدەمەسىندە قۇتقارۋشىلاردىڭ الەۋمەتتىك مارتەبەسىن كوتەرۋگە قاتىستى ماسەلە پىسىقتالىپ جاتقانىن ءسوز ەتتى:
«قۇتقارۋشىلاردىڭ زەينەت جاسىنا كەلسەك، قازىرگى تاڭدا توتەنشە جاعدايلار مينيسترلىگى مۇددەلى مەملەكەتتىك ورگاندارمەن بىرگە قۇتقارۋشىلاردى ازاماتتىق قىزمەتشىلەر ساناتىنان ازاماتتىق قورعانىس ساناتىنا وتكىزۋ ماسەلەسىن پىسىقتاپ جاتىر» دەلىنگەن جاۋاپتا.
ونىڭ حابارلاۋىنشا، بۇل قادامدار ارقىلى قۇتقارۋشىلاردىڭ زەينەتكە شىعۋ جاسىن ەرتەلەتىپ، شەكتىك جاسىن تومەندەتۋگە نەگىز بار.
«اتالعان وزگەرىس قۇتقارۋشىلاردى الەۋمەتتىك كەپىلدەندىرۋ شارالارىن جەتىلدىرەدى. ونىڭ ىشىندە ەڭبەك ءوتىلى بويىنشا (25 جىل) نەمەسە شەكتى جاسقا (48 جاس) جەتۋىنە بايلانىستى زەينەتكە شىعۋعا قۇقىق بەرەدى. سونداي-اق، قۇقىق قورعاۋ ورگانى قىزمەتكەرلەرىنە بەرىلەتىن وزگە دە جەڭىلدىكتەر ۇسىنىلادى»، - دەپ جازادى پرەمەر-مينيستر.
سونىمەن قاتار، مالىمدەمەدە قۇتقارۋشىلار قىزمەتىن جانداندىرۋ، ولاردىڭ الەۋەتىن وڭتايلاندىرۋ ماقساتىمەن تۇرعىن ءۇي تولەمدەرىن جۇزەگە اسىرۋ تاسىلدەرىنىڭ ويلاستىرىلىپ، قايتا تالقىعا ءتۇسىپ جاتقانى دا ءسوز بولادى.
"ادىرنا" ۇلتتىق پورتالى
