تاراز قالاسىنىڭ №2 سوتىندا ءماجىلىس دەپۋتاتى جيگۋلي دايراباەۆتىڭ ەكى ۇلىنا سوت ۇكىمى شىقتى، دەپ حابارلايدى “ادىرنا” ۇلتتىق پورتالى.
سوت قىلمىستىق كودەكستىڭ 190-بابى 4-بولىگى 2-تارماعى بويىنشا قاتىستى قىلمىستىق ءىستى قارادى. بۇل باپتا الاياقتىق، ياعني ادامدار توبىمەن الدىن الا ءسوز بايلاسۋ ارقىلى اسا ءىرى مولشەردە بوتەننىڭ مۇلكىن جىمقىرۋ نەمەسە الداۋ نەمەسە سەنىمدى تەرىس پايدالانۋ جولىمەن بوتەن مۇلiككە قۇقىقتى يەمدەنۋ ارەكەتى قاراستىرىلعان.
سوت بارىسىندا ەرلان كۇلەكەەۆتىڭ جامبىل وبلىسى اۋىلشارۋاشىلىق باسقارماسى جەتەكشىسىنىڭ وسىمدىك شارۋاشىلىعى بويىنشا ورىنباسارى بولعان كەزىندە كاسىپكەرلەر ەلجان ەلىباي، مارات دايراباەۆ جانە ديدار مولداقالىق (كەيىنگى ەكەۋى دەپۋتات جيگۋلي دايراباەۆتىڭ ۇلدارى) سۋبسيديالاۋ قاعيدالارىن بۇزىپ، مەملەكەتكە 550 849 430 تەڭگە كولەمىندە شىعىن كەلتىرگەنى انىقتالدى.
ولار ساتىپ الىنعان «البيون» قۇلپىناي كوشەتتەرى ءۇشىن (ولاردى شارۋا قوجالىقتارىنا راسىمدەپ) مەملەكەتتىك سۋبسيديالار العان، ولاردىڭ ءبىر بولىگى الاياقتىق جولىمەن ۇرلانىپ، جەكە قاجەتتىلىكتەرىنە جۇمسالعان.
پروكۋرور قىلمىستاردىڭ جيىنتىعى بويىنشا دايراباەۆ پەن مولداقالىقتى 5 جىلعا باس بوستاندىعىنان ايىرۋ جازاسىن شارتتى تۇردە تاعايىنداۋدى سۇرادى.
ال باسقارما باسشىسىنىڭ ورىنباسارى ەرلان كۇلەكەەۆتى 6 جىلعا باس بوستاندىعىنان ايىرۋ، ەلجان ەلىبايدىڭ مۇلكىن تاركىلەپ، 5 جىلعا باس بوستاندىعىنان ايىرۋ جازاسىن تاعايىنداۋدى سۇرادى.
سوتتالۋشىلار كىنالەرىن مويىنداماي، وزدەرىن اقتاۋدى سۇرادى.
سوت ۇكىمىمەن باسقارما باسشىسىنىڭ ورىنباسارى بولعان ەرلان كۇلەكەەۆ 6 جىلعا باس بوستاندىعىنان ايىرىلدى. ول ءومىر بويىنا مەملەكەتتىك قىزمەتتە لاۋازىم اتقارۋ قۇقىعىنان ايىرىلدى.
ەلجان ەلىبايدىڭ مۇلكى تاركىلەنىپ، كەز كەلگەن مەنشىك نىسانىنداعى ۇيىمداردا باسشىلىق لاۋازىمدى اتقارۋ قۇقىعىنان ايىرىلدى. ول 5 جىلعا سوتتالدى.
مارات دايراباەۆ جانە ديدار مولداقالىقتىڭ مۇلكى تاركىلەنىپ، كەز كەلگەن مەنشىك نىسانىنداعى ۇيىمداردا باسشىلىق لاۋازىمدى اتقارۋ قۇقىعىنان ايىرىلدى. ەكەۋى دە 5 جىلعا شارتتى تۇردە باس بوستاندىعىنان ايىرىلدى. ولارعا پروباتسيالىق باقىلاۋ قويىلادى.
ۇكىم زاڭدى كۇشىنە ەنگەن جوق.
