Taraz qalasynyŋ №2 sotynda mäjılıs deputaty Jiguli Dairabaevtyŋ ekı ūlyna sot ükımı şyqty, dep habarlaidy “Adyrna” ūlttyq portaly.
Sot qylmystyq kodekstıŋ 190-baby 4-bölıgı 2-tarmaǧy boiynşa qatysty qylmystyq ıstı qarady. Būl bapta alaiaqtyq, iaǧni adamdar tobymen aldyn ala söz bailasu arqyly asa ırı mölşerde bötennıŋ mülkın jymqyru nemese aldau nemese senımdı terıs paidalanu jolymen böten mülikke qūqyqty iemdenu äreketı qarastyrylǧan.
Sot barysynda Erlan Külekeevtıŋ Jambyl oblysy auylşaruaşylyq basqarmasy jetekşısınıŋ ösımdık şaruaşylyǧy boiynşa orynbasary bolǧan kezınde käsıpkerler Eljan Elıbai, Marat Dairabaev jäne Didar Moldaqalyq (keiıngı ekeuı deputat Jiguli Dairabaevtyŋ ūldary) subsidiialau qaǧidalaryn būzyp, memleketke 550 849 430 teŋge kölemınde şyǧyn keltırgenı anyqtaldy.
Olar satyp alynǧan «Albion» qūlpynai köşetterı üşın (olardy şarua qojalyqtaryna räsımdep) memlekettık subsidiialar alǧan, olardyŋ bır bölıgı alaiaqtyq jolymen ūrlanyp, jeke qajettılıkterıne jūmsalǧan.
Prokuror qylmystardyŋ jiyntyǧy boiynşa Dairabaev pen Moldaqalyqty 5 jylǧa bas bostandyǧynan aiyru jazasyn şartty türde taǧaiyndaudy sūrady.
Al basqarma basşysynyŋ orynbasary Erlan Külekeevtı 6 jylǧa bas bostandyǧynan aiyru, Eljan Elıbaidyŋ mülkın tärkılep, 5 jylǧa bas bostandyǧynan aiyru jazasyn taǧaiyndaudy sūrady.
Sottaluşylar kınälerın moiyndamai, özderın aqtaudy sūrady.
Sot ükımımen basqarma basşysynyŋ orynbasary bolǧan Erlan Külekeev 6 jylǧa bas bostandyǧynan aiyryldy. Ol ömır boiyna memlekettık qyzmette lauazym atqaru qūqyǧynan aiyryldy.
Eljan Elıbaidyŋ mülkı tärkılenıp, kez kelgen menşık nysanyndaǧy ūiymdarda basşylyq lauazymdy atqaru qūqyǧynan aiyryldy. Ol 5 jylǧa sottaldy.
Marat Dairabaev jäne Didar Moldaqalyqtyŋ mülkı tärkılenıp, kez kelgen menşık nysanyndaǧy ūiymdarda basşylyq lauazymdy atqaru qūqyǧynan aiyryldy. Ekeuı de 5 jylǧa şartty türde bas bostandyǧynan aiyryldy. Olarǧa probasiialyq baqylau qoiylady.
Ükım zaŋdy küşıne engen joq.
Ūqsas jaŋalyqtar
