ەلباسىعا العىس ايتقان ساعىنتاەۆ نەگە حالىققا العىس ايتپايدى؟

1409

تاۋەلسىز قازاقستاننىڭ رەت سانى بويىنشا 10-شى ۇكىمەتىن باسقارعان ساعىنتاەۆ تا تاريح پاراعىنا كەتتى. بەيرەسمي تۇردە "قاتىندار وتستاۆكىگە كەتىرگەن ۇكىمەت" دەپ اتالىپ كەتكەن مينيسترلەر كابينەتىنىڭ ەكس-باسشىسى باقىتجان ءابدىرۇلى ارنايى مالىمدەمە جاسادى.

«بۇگىن ۇكىمەت وتستاۆكاعا كەتتى. تاۋەلسىز قازاقستان مەملەكەتىنىڭ نەگىزىن قالاپ، بۇگىنگى بيىكتەرگە جەتكىزگەن ەلباسى حالقىنىڭ ءوسىپ-وركەندەۋىن ارقاشان ەڭ باستى قاعيدا رەتىندە ۇستانىپ، ءاربىر شەشىمىن مەملەكەت پەن حالىقتىڭ مۇددەسى تۇرعىسىنان قابىلداپ كەلەدى. مەملەكەت قۇرۋ وڭاي جۇمىس ەمەس. جاس مەملەكەتتى ءتۇرلى قايشىلىقتار مەن قاقتىعىستاردان امان الىپ ءوتىپ، تاريحي ولشەممەن العاندا تىم قىسقا مەرزىمدە وسىنداي ابىرويلى ەل ەتۋ شىن مانىندە شەكسىز قۇرمەتكە لايىق. ەلباسى - ەلىمىزدىڭ سان مىڭ جىلدىق تاريحىنداعى ەڭ جاۋاپتى كەزەڭدە حالقىمىزدىڭ باعىنا بەرگەن ۇلى دا جاسامپاز تۇلعاسى. سول سەبەپتى، حالقىمىز باياندى بۇگىنى مەن جارقىن بولاشاعىن تەك قانا ەلباسىنىڭ ەسىمىمەن بايلانىستىرادى. وتكەن ەكى جارىم جىل بويى ۇكىمەت تىزگىنىن تاپسىرىپ، جوعارى سەنىم بىلدىرگەنى ءۇشىن ەلباسى نۇرسۇلتان ءابىشۇلى نازارباەۆقا شىنايى العىسىمدى بىلدىرەمىن» دەپتى ساعىنتاەۆ.

سوندا، ەلباسىعا راحمەت ايتقان ساعىنتاەۆ حالىققا نەگە راحمەت ايتپايدى؟

ازىق-تۇلىك باعاسى كوتەرىلىپ، ايلىعى شايلىعىنا جەتپەي جاتسا دا شۇكىر دەپ وتىرعانى ءۇشىن.

بۇكىل ەلدىڭ موينىنا نەسيەنى ەسەپسىز پايىزبەن ءىلىپ بەرگەن بانكتەردى حالىقتىڭ اقشاسىنا قارجىلاندىرىپ وتىرسا دا، "بۇل قالاي؟" دەمەگەنى ءۇشىن.

كوكتەم سايىن سۋ استىندا قالسا دا، باسىنىڭ اماندىعىنا ءتاۋبا ەتكەنى ءۇشىن.

مۇنايدىڭ ۇستىندە وتىرعان مەملەكەت جانار-جاعار مايدىڭ باعاسىن رەسەي نارىعىمەن باعالايتىنىنا مىڭق ەتپەيتىنى ءۇشىن.

زەينەت جاسىن ۇزارتقان سايىن قىڭق ەتپەيتىنى ءۇشىن.

قانشاما ۇلەسكەرلەر زاڭدى پاتەرىنە كىرە الماسا دا، سول ءۇيدىڭ يپوتەكاسىن تولەپ وتىرسا دا، ەرتەڭىنەن ءۇمىتىن ۇزبەگەنى ءۇشىن.

مەكتەپتەگى رەفورمالاردان بالا تۇگىلى، مۇعالىم شاتاساتىنداي بولسا دا، وكىمەتتىكى دۇرىس دەپ، ۇندەمەي ەڭبەكتەنە بەرەتىنى ءۇشىن.

ەل قارا جامىلعان قايعىلى وقيعالاردا ءبىر مينيستر ەل الدىنا شىعىپ جاۋاپ بەرمەسە دە، ءوز جاراسىن ءوزى ەمدەپ وتىرعانى ءۇشىن.

تىزە بەرسە كوپ. ەشتەڭە دەمەي-اق «حالقىم، ساعان راحمەت» دەپ ءبىر-اۋىز لەبىزىن بىلدىرسە جەتىپ جاتىر ەدى. حالىق تا ءسابي سەكىلدى عوي، جاڭاعى سوزگە كامپيت ۇستاتقان بالاداي ءماز بولىپ قالار ەدى.

جوق، ولاي ايتا المادى. ايتقىزباسى ايتقىزبايدى. ويتكەنى، بىزدە باسشىلاردى حالىق سايلامايدى. پرەزيدەنت تاعايىندايدى. سوندىقتان، پرەزيدەنتكە راحمەت!

وڭعار قابدەن

"ادىرنا" ۇلتتىق پورتالى

پىكىرلەر
رەداكتسيا تاڭداۋى