Elbasyǵa alǵys aıtqan Saǵyntaev nege halyqqa alǵys aıtpaıdy?

1314

Táýelsiz Qazaqstannyń ret sany boıynsha 10-shy Úkimetin basqarǵan Saǵyntaev ta tarıh paraǵyna ketti. Beıresmı túrde "Qatyndar otstavkige ketirgen Úkimet" dep atalyp ketken mınıstrler kabınetiniń eks-basshysy Baqytjan Ábdiruly arnaıy málimdeme jasady.

«Búgin Úkimet otstavkaǵa ketti. Táýelsiz Qazaqstan memleketiniń negizin qalap, búgingi bıikterge jetkizgen Elbasy halqynyń ósip-órkendeýin árqashan eń basty qaǵıda retinde ustanyp, árbir sheshimin memleket pen halyqtyń múddesi turǵysynan qabyldap keledi. Memleket qurý ońaı jumys emes. Jas memleketti túrli qaıshylyqtar men qaqtyǵystardan aman alyp ótip, tarıhı ólshemmen alǵanda tym qysqa merzimde osyndaı abyroıly El etý shyn máninde sheksiz qurmetke laıyq. Elbasy - elimizdiń san myń jyldyq tarıhyndaǵy eń jaýapty kezeńde halqymyzdyń baǵyna bergen uly da jasampaz tulǵasy. Sol sebepti, halqymyz baıandy búgini men jarqyn bolashaǵyn tek qana Elbasynyń esimimen baılanystyrady. Ótken eki jarym jyl boıy Úkimet tizginin tapsyryp, joǵary senim bildirgeni úshin Elbasy Nursultan Ábishuly Nazarbaevqa shynaıy alǵysymdy bildiremin» depti Saǵyntaev.

Sonda, Elbasyǵa rahmet aıtqan Saǵyntaev halyqqa nege rahmet aıtpaıdy?

Azyq-túlik baǵasy kóterilip, aılyǵy shaılyǵyna jetpeı jatsa da shúkir dep otyrǵany úshin.

Búkil eldiń moınyna nesıeni esepsiz paıyzben ilip bergen bankterdi halyqtyń aqshasyna qarjylandyryp otyrsa da, "bul qalaı?" demegeni úshin.

Kóktem saıyn sý astynda qalsa da, basynyń amandyǵyna táýbá etkeni úshin.

Munaıdyń ústinde otyrǵan memleket janar-jaǵar maıdyń baǵasyn Reseı naryǵymen baǵalaıtynyna myńq etpeıtini úshin.

Zeınet jasyn uzartqan saıyn qyńq etpeıtini úshin.

Qanshama úleskerler zańdy páterine kire almasa da, sol úıdiń ıpotekasyn tólep otyrsa da, erteńinen úmitin úzbegeni úshin.

Mekteptegi reformalardan bala túgili, muǵalim shatasatyndaı bolsa da, ókimettiki durys dep, úndemeı eńbektene beretini úshin.

El qara jamylǵan qaıǵyly oqıǵalarda bir mınıstr el aldyna shyǵyp jaýap bermese de, óz jarasyn ózi emdep otyrǵany úshin.

Tize berse kóp. Eshteńe demeı-aq «halqym, saǵan rahmet» dep bir-aýyz lebizin bildirse jetip jatyr edi. Halyq ta sábı sekildi ǵoı, jańaǵy sózge kámpıt ustatqan baladaı máz bolyp qalar edi.

Joq, olaı aıta almady. Aıtqyzbasy aıtqyzbaıdy. Óıtkeni, bizde basshylardy halyq saılamaıdy. Prezıdent taǵaıyndaıdy. Sondyqtan, Prezıdentke rahmet!

Ońǵar Qabden

"Adyrna" ulttyq portaly

Pikirler
Redakııa tańdaýy