مەملەكەت باسشىسىنىڭ جارلىعىمەن تامارا بوسىمبەكقىزى دۇيسەنوۆا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى لاۋازىمىنا قايتا تاعايىندالدى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
ايتا كەتەرلىگى، قازاقستاندا زەينەتكە شىعۋ جاسىن تومەندەتۋگە قاتىستى باستامالار ءجيى كوتەرىلىپ كەلەدى. 15 ناۋرىز كۇنى وتكەن سەناتتىڭ جالپى وتىرىسىندا بۇعان قاتىستى "بۇرىنعى" جانە "قازىرگى" ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا تومەندەگىدەي جاۋاپ قاتقان ەدى.
"ناتيجەسىندە، ازاماتتارىمىزدىڭ ءومىر ءسۇرۋ ۇزاقتىعىنىڭ جاقساراتىن بولسا، 2029 جىلدان باستاپ ءبىز بۇل ماسەلەگە قايتا ورالامىز، ەگەر ءبارى وسى دەڭگەيدە قالسا نەمەسە، كەرىسىنشە، تومەنىرەك بولسا، وندا ارينە، جاس شەكتەۋى ماسەلەسى مىندەتتى تۇردە قايتا قارالادى".
مينيستر قازاقستاندىقتاردىڭ زەينەتكە شىعۋ جاسى ءومىر ءسۇرۋ ۇزاقتىعى جانە ولاردى زەينەتاقىمەن قامسىزداندىرۋ دەڭگەيى بويىنشا قاراستىرىلاتىنىن مالىمدەگەن بولاتىن. مينيستر زەينەت جاسىنىڭ تومەندەۋىنە قاتىستى ناقتى جاۋاپتى بەرۋگە اسىقپاي، بۇل ماسەلەگە 2029 جىلى قايتا ورالاتىنىن حابارلاپ، قىسقا قايىرعان-تۇعىن.
"ناتيجەسىندە، ازاماتتارىمىزدىڭ ءومىر ءسۇرۋ ۇزاقتىعىنىڭ جاقساراتىن بولسا، 2029 جىلدان باستاپ ءبىز بۇل ماسەلەگە قايتا ورالامىز، ەگەر ءبارى وسى دەڭگەيدە قالسا نەمەسە، كەرىسىنشە، تومەنىرەك بولسا، وندا ارينە، جاس شەكتەۋى ماسەلەسى مىندەتتى تۇردە قايتا قارالادى", دەپ حابارلايدى تامارا دۇيسەنوۆا.
ورايى كەلگەندە ايتا كەتەيىك، "بۇرىنعى" جانە "قازىرگى" ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا 1965 جىلى 11 قاڭتاردا تۇركىستان وبلىسىندا تۋعان.
1987 جىلى تاشكەنت حالىق شارۋاشىلىعى ينستيتۋتىن ءبىتىردى، ماماندىعى – ينجەنەر-ەكونوميست، ەكونوميكا عىلىمدارىنىڭ كانديداتى.
ەڭبەك جولىن 1988 جىلى ينستيتۋتتى اياقتاعاننان كەيىن وڭتۇستىك قازاقستان وبلىسى سارىاعاش اۋدانىنداعى ورتا مەكتەپتىڭ ينفورماتيكا ءپانىنىڭ مۇعالىمى قىزمەتىنەن باستادى.
1988-1992 جىلدارى وزبەك سسر-ءنىڭ مەملەكەتتىك جوسپارلاۋ كوميتەتىنىڭ ەكونوميكا عىلىمي زەرتتەۋ ينستيتۋتىنىڭ ەكونوميسى بولىپ جۇمىس ىستەدى. كەيىننەن وڭتۇستىك قازاقستان وبلىسى سارىاعاش اۋدانى اكىمىنىڭ كەڭەسشىسى، ورىنباسارى قىزمەتىن اتقاردى.
1997-1999 جىلدارى – شىمكەنت قالاسى اكىمىنىڭ ءبىرىنشى ورىنباسارى;
1999-2002 جىلدارى – وڭتۇستىك قازاقستان وبلىسى اكىمىنىڭ ورىنباسارى;
2002-2006 جىلدارى – قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ ۆيتسە - ءمينيسترى;
2006 - 2008 جىلدارى - وڭتۇستىك قازاقستان وبلىسى اكىمىنىڭ ورىنباسارى;
2008 – 2013 جىلدارى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى; ەڭبەك جانە حالىقتى الەۋمەتتىك قورعاۋ ۆيتسە-ءمينيسترى (02.2013-06.2013); ەڭبەك جانە حالىقتى الەۋمەتتىك قورعاۋ ءمينيسترى (2013-2014); قر دەنساۋلىق ساقتاۋ جانە الەۋمەتتىك دامۋ ءمينيسترى (2014-2017); ەڭبەك جانە حالىقتى الەۋمەتتىك قورعاۋ ءمينيسترى (2017-2018); «Nur Otan» پارياسىنىڭ حاتشىسى (2018-2019). «ەڭبەك رەسۋرستارىن دامىتۋ ورتالىعى» اق جەتەكشىسى (2019-2020).
2020 جىلدىڭ مامىرىندا پرەزيدەنت كومەكشىسى-پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى بولىپ تاعايىندالعان. «قۇرمەت» وردەنىمەن، «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان كونستيتۋتسياسىنا 10 جىل» (2005) مەدالدارىمەن ماراپاتتالعان.
تامارا بوسىمبەكقىزى دۇيسەنوۆا 2022 جىلى 11 ساۋىردەن بەرى ەڭبەك جانە حالىقتى الەۋمەتتىك قورعاۋ ءمينيسترى قىزمەتىن اتقارىپ كەلدى.
"ادىرنا" ۇلتتىق پورتالى
