30 ناۋرىز كۇنى رەسەيدىڭ فەدەرالدى قاۋىپسىزدىك قىزمەتى (فسب) امەريكالىق جۋرناليست ەۆان گەرشكوۆيچتى ەكاتەرينبۋرگ قالاسىندا جۇرگەن جەرىنەن ۇستادى. The Wall Street Journal (WSJ) ءتىلشىسى تىڭشى رەتىندە تانىلىپ، ۇستىنەن ءىس قوزعالدى، دەپ حابارلايدى "ادىرنا" ۇلتتىق پورتالى.
سوت 30 ناۋرىزدا Wall Street Journal ءجۋرناليسى ەۆان گەرشكوۆيچتى تىڭشىلىق جاسادى دەگەن ايىپپەن قاماۋعا الدى. "دوجد" تەلەارناسىنىڭ حابارلاۋىنشا، امەريكالىق جۋرناليستەرگە قاتىستى مۇنداي وقيعا 1986 جىلدان كەيىن، اراعا ۇزاق ۋاقىت سالىپ تاعى قايتالانىپ وتىر.
گەرشكوۆيچ رەسەيلىكتەردىڭ "پمك ۆاگنەرگە" قاتىسى تۋرالى ماتەريال دايىنداۋ ءۇشىن ەكاتەرينبۋرگكە بارعان جەرىندە ۇستالدى.
"كەشكى ۆەدوموستي"-ءدىڭ مالىمەتىنشە، ءجۋرناليستى قالا ورتالىعىنداعى مەيرامحانا جانىندا قۇرىقتالعان. قاراپايىم كيىنگەن قاۋىپسىزدىك قىزمەتكەرلەرى ەر ادامدى باستىرمالاپ، كولىككە قاراي سۇيرەپ، ۇر دا سوق ارەكەتتەرمەن جۇلقىلاي جونەلگەن.
رەسەيدىڭ بارلاۋ قىزمەتى ءجۋرناليستىڭ "اقش تاپسىرماسى بويىنشا" اقپارات جيناۋمەن اينالىسقانىن مالىمدەدى.
ورايى كەلگەندە ايتا كەتەيىك، تىڭشى رەتىندە ايىپ ارقالاعان ەۆان گەرشكوۆيچ ماسكەۋدە 2017 جىلدان بەرى جۇمىس ىستەپ كەلەدى. ول ۇدايى تۇردە رەسەي مەن ۋكرايناداعى اقيقاتى كۇڭگىرت وقيعالار جايىندا قالام تەربەپ، ساياسي تاقىرىپتارىڭ تەرىسكەي تۇسىن اشىق جازادى.
"ادىرنا" ۇلتتىق پورتالى
